Ana Zargin Wasu ’Yan Kasuwa Da Wanke ’Ya’yan Itatuwa Da Sabulun Wanki

Advertisements

Ana zargin wasu masu sayar da ’ya’yan itatuwa a wasu kasuwannin Najeriya da amfani da sabulun wanki da wasu sinadarai wajen tsaftace kayansu domin su yi sheƙi da jan hankalin masu saye.

Jaridar Vanguard ce ta rawaito lamarin, inda ta ce wasu ’yan kasuwar na amfani da waɗannan sinadarai wajen cire datti da tabo daga jikin ’ya’yan itatuwa, tare da inganta kamanninsu domin samun ƙarin ciniki.

Wani Jami’an Dansanda Ya Kashe Abokiyar Aikinsa Kuma Ya Kashe Kansa A Kogi

Rahoton ya ce ana amfani da wannan hanya wajen wanke kankana, ayaba, mangwaro, lemu da sauran ’ya’yan itatuwa. An kuma bayyana cewa wasu daga cikin masu sayar da su ba sa kurkure kayan da ruwa mai tsafta bayan amfani da sabulun.

Wani mai sayar da ’ya’yan itatuwa, Audu Musa, ya ce wasu ’yan kasuwa na amfani da sabulun wanki domin cire laka da datti da kuma sa kayansu su yi kyau. Sai dai ya bayyana cewa shi ba ya amfani da wannan hanya wajen tsaftace kayansa.

Masana lafiya sun yi gargaɗin cewa sabulun wanki ba a ƙera shi domin wanke abinci ba, kuma haɗiye ragowar sinadaransa na iya haifar da matsalolin lafiya, kamar tashin zuciya, amai, ciwon ciki da gudawa, gwargwadon nau’in sinadarin da adadinsa.

Rahoton ya kuma danganta wa wata likitar cututtukan ciki, Dr Amara Nwosu, gargaɗin cewa yawan fuskantar wasu sinadarai na iya cutar da tsarin narkar da abinci, yayin da wasu sinadarai masu illa za su iya shafar hanta ko ƙoda idan an fuskance su na dogon lokaci.

Lamarin ya jawo damuwa kan lafiyar abinci, inda ake kira ga hukumomin da abin ya shafa da su ƙara sa ido kan yadda ake tsaftacewa da sayar da ’ya’yan itatuwa a kasuwanni.

An shawarci masu saye da su riƙa wanke ’ya’yan itatuwa da ruwan sha mai tsafta kafin cin su. Haka kuma, bai kamata a ɗauki sheƙin ’ya’yan itatuwa a matsayin hujjar cewa an wanke su da sinadarai ba, domin wasu na iya yin sheƙi a dabi’ance..