BAUCHI: An Kama Matar Aure Bisa Zargin Soka Wa Mijinta Wuƙa Kan Waya

Advertisements

Rundunar ’Yan Sandan Jihar Bauchi ta kama wata mata mai shekara 18, Fatima Dalha, bisa zargin soka wa mijinta mai shekara 30 wuƙa a ciki sakamakon saɓanin da ya shiga tsakaninsu kan kuɗi, waya da wasu kayayyaki.

Kakakin rundunar, SP Nafiu Habib, ya bayyana cewa lamarin ya faru ne da safiyar Lahadi, 25 ga Oktoba, 2026, a yankin Lirr Bajar da ke Ƙaramar Hukumar Dass ta jihar.

Karancin Ma’aikatan Jinya Na Barazana Ga Kula Da Masu Cutar Kansa A Najeriya

Ya ce jami’an ’yan sanda sun ceto matar daga hannun fusatattun jama’a, yayin da aka garzaya da mijin zuwa asibiti, inda ake ba shi kulawar likitoci.

A cewar kakakin, an ƙwato wuƙar da ake zargin an yi amfani da ita wajen aikata laifin, yayin da rundunar ke shirin miƙa lamarin ga Sashen Binciken Manyan Laifuka na jihar domin gudanar da cikakken bincike.

Kwamishinan ’Yan Sandan Jihar Bauchi, CP Sani-Omolori Aliyu, ya yi kira ga ma’aurata da su riƙa warware saɓanin da ke tsakaninsu cikin lumana, tare da guje wa duk wani mataki da zai iya jefa rayuwa cikin haɗari.

Ya kuma gargaɗi jama’a da su guji ɗaukar doka a hannunsu, yana mai kira gare su da su riƙa kai rahoton duk wani laifi ga hukumomin da abin ya shafa.

DAILY TRUST