Yadda gwamnatin Lagos ta jefa ‘yan kasuwar dabbobi ta Alaba Rago cikin zulumi

Alhaji Adamu Katagum, Wazirin kasuwar Alaba Rago ya shaida wa BBC cewa wannan sanarwa ta jefa su cikin zulumi ganin cewa suna kasuwanci da makwabtan kasashe kamar Jamhuriyyar Benin da Togo da Ghana da sauransu.

A cewarsa, ba su da hannu a rashin tsaron da ake fuskanta a yankin kuma sun dade da bai wa gwamnati goyon baya na yaki da masu haddasa rashin tsaro a yankin.

Ya kara da cewa a shirye suke su inganta kasuwar da tsari daidai da bukatar gwamnatin Jihar Lagos, amma batun su tashi ba ta taso ba

Kasuwar al’ummar Arewa’

Bayanai sun nuna cewa shugabannin al’ummar arewacin Najeriya, karkashin marigayi Sarkin Hausawan jihar Legas, Alhaji Yaro Dogara, ne suka nemi izinin gina Kasuwar Alaba, kusan shekara hamsin da suka gabata, wadda ta amince.

Rahotanni sun ce fiye da kashi saba’in daga mazauna kasuwar dai sun fito daga arewacin Najeriya ne.

Ko a jiya an yi mummunan rikici tsakanin ‘yan okada da ‘yan sanda a kan babban titin Legas zuwa Badagry – hanyar da ke kai wa ga babbar kasuwar ta Alaba Rago.

Hakan ya sanya ake gargadin mutane da su yi hattara kan abubuwan da ke kai wa suna komowa sakamakon rikici da yanzu ake zaman dardar tsakanin ‘yan sanda da masu baburan haya kan hanyar Lagos zuwa Badagry.

Gwamnatin Jihar Lagos dai na zargin cewa shugabannin kasuwar ba sa daukar matakan kula da tsaronta suna masu cewa ta zama matsugunin bata-gari, ko da yake shugabannin sun sha musanta zargin.

Yanzu haka shugabannin na wani zama tare da shirin aike wa da wasiku ga daukacin gwamnonin da sarakuna da sauran masu fada a ji daga arewacin kasar don su bai wa gwamna Babajide Sanwo-Olu baki da kar a tashe su daga kasuwar.