SAI DAI BUHARI YA YI WA DAN TAKARARSA KAMFE –FAYEMI

Daga Muhammad Muhammad zahraddin

Shugaban Kungiyar Gwamnonin Najeriya, Gwamna Kayode Fayemi, ya musanta cewa gwamnonin jam’iyyarsa ta APC mai mulki sun amince da mutumin da Shugaba Buhari ke so ya zama sabon shugaban jam’iyyar.

Fayemi ya bayyana haka ne kasa da awa 24 bayan Shugaban Kungiyar Gwamnonin APC, Gwamna Atiku Bagudu na Jihar Kebbi, ya ce gwamnonin jam’iyyar sun yi ittifaki da Buhari, sun kuma amince da wanda Buharin ya fi so ya zama shugaban jam’iyyar.

Amma a wani abu mai kama da mi’ara-koma-baya, a ranar Alhamis, Fayemi, wanda ya halarci zaman da gwamnonin APC 16, daga cikin 22 da take da su, suka yi da Buhari a ranar Laraba, ya ce bai san da maganar ba.

Da yake amasa tambaya da aka yi mishi game da batun a wani taro da Cibiyar Cigaba da Dimokuradiyya (CDD) ta shirya a ranar Alhamis, Fayemi ya ce, “Ni ma ba ni da masaniyar cewa Shugaban Kasa na da dan gaban goshi (a cikin ’yan takarar shugabancin jam’iyya), ko da yake ’yancinsa ne ya zabi dan takararsa.

“A matakin jam’iyyarmu, sai dai [shi shugaban kasa] ya fito ya yi wa dan takararsa kamfe a dandalin Eagle Square ranar Asabar, idan dan takararsa ya ci, shi ke nan, idan kuma ya sha kasa, sai ya hakura,” inji Fayemi.

A wurin taron, wakilinmu ya nemi karin haske daga gwamnan game da makomar dimokuradiyyar cikin gida a jam’iyyar APC, idan har za ta fitar da ’yan takara babu hammaya, alhali wasu sun riga sun sayi takardun tsayawa takara.

Fayemi ya kada baki ya ce, “Abin da muke son nunawa shi ne irin hadin kan da muke da shi a APC, wanda ke iya kasancewa ta fuskoki daban-daban, matukar kowane bangare ya yi na’am da abin da aka yi; Sakamakon abin da aka yin za a gani a ranar Asabar.”

• Walankeluwar Fayemi
Sai dai kuma Jim kadan bayan nan ne kuma Sakataren Yada Labaran gwamnan na Jihar Ekiti, Yinka Oyebode, ya fitar da wata sanarwa cewa an yi wa kalaman mummunar fahimta.

A cewarsa, “Jama’a su sani cewa, a amsar tambayar da aka yi wa Gwamna Fayemi kan zargin shugaban kasa da kakaba wa APC shugaban jam’iyya a babban taronta mai zuwa, cewa ya yi, abin da ya fi damun shugaban kasa shi ne samun hadin kan jam’iyya.

“[Fayemi] Ba shi da masaniyar cewa akwai wani dan takarar kujerar shugaban jam’iyya da shugaban kasa yake goyon baya.

“Amma idan har shugaban kasa yana da wanda yake goyon baya, shugaban kasa mutum ne mai bin dimokura diyya, don haka masu sabanin ra’ayinsa na iya fitowa takara.
“Gwamna Fayemi shugaba ne da aka sani wanda ba ya soki-burutsu.”

Source: aminiya