Yadda ‘Hackers’ Ke Amfani Da Hanyar Smishing Wajen Yin Kutse

DAGA YASIR SANI ABDULLAHI 

A kullum madatsa ‘Hackers’ suna bin hanyoyi daban-daban wajen ganin sun yi kutse a mutane. Kutsen kuwa ya hada da shafukan sada zumunta kuma har da asusun ajiya na Banki.

Wata hikimar da suke yi wajen yin datsa (Hacking) wadda ta yi kaurin suna a wannan lokacin da ake kira smishing ta sanya mutane da dama a halin ha’ula’i, duba da yadda ake yaudararsu don cutar da su.

Masu zanga-zanga sun toshe hanyoyi a arewacin Kosovo

Smishing wata dabarar kutse ce da ‘yan madatsa, wadanda aka fi sani da hackers su ke amfani da ita wajen yaudarar mutane. Suna amfani da wannan dabarar ne wajen yaudarar mutane ta hanyar tura musu sakonni ana tambayarsu game da wadansu bayanansu na sirri.

Irin wannan kutsen yana daga cikin ire-iren kutsen Social Engineering da ya addabi mutane. Don haka mutane da dama suna yawan korafe-korafe a kan yadda ake musu kutse ta hanyar shiga asusansu ba tare da saninsu ba.

Sai dai duk da haka, abin da ba a sani ba shi ne, mutanen ne da kansu ke bayar da bayanansu da hanunsu.

Hanya mafi sauki da madatsan kan bi wajen rudar mutane ita ce tura musu sakonni, musamman zuwa asusun sakonninsu (inbod) na waya da ke nuna kamar sakon yana da inganci, misali; sako daga 500, ko 424 ko makamancin haka. Wato dai wani code, wanda ke nuna cewa ba daga lambar waya bane, don kar a gane su.