Hukumar NDLEA Ta Kama Mutane 58 Da Ake Zargi Da Shan Miyagun Kwayoyi A Filin Wasa Na Sani Abacha Da Ke Kano

DAGA MUHAMMAD MUHAMMAD ZAHRADDIN 

Jami’an hukumar NDLEA ta kama mutane 58 da ake zargi da shan miyagun kwayoyi a filin wasa na Sani Abacha da ke Kano a ranar Laraba, kamar yadda kakakin hukumar a jihar Kano, Sadiq Muhammad-Maigatari ya bayyana a ranar Juma’a.

Rahotanni na nuni da cewa kwamandan hukumar na jihar, Abubakar Idris-Ahmad, ya bayyana cewa an kama su ne a yayin wani sabon shiri na yaki da muggan kwayoyi da aka kaddamar a jihar a lokacin da ake kira Operation Hana Maye’ wato (Operation Stop Abuse).

Hukumar NCC ta dakatar da shirin hana masu layin Glo kiran layin MTN

Sabon farmakin na da nufin yaki da safarar miyagun kwayoyi da shaye-shayen miyagun kwayoyi a jihar Kano.

“A ranar Laraba, an gudanar da wani samame domin tabbatar da inganci da kuma rage duk wata turjiya a filin wasa na Sani Abacha wanda ya koma inda ake gudanar da ayyukan da suka shafi muggan kwayoyi,” in ji Idris-Ahmad a cikin sanarwar.

Ya kara da cewa, tawagar jami’an da suka samu horo sosai sun cafke maza 58 da ake zargi da shan miyagun kwayoyi tare da kwato wasu haramtattun abubuwa daga hannunsu.

“Kame wadanda babbar nasara ce ga hukumar NDLEA a yakin da take yi da ayyukan da suka shafi miyagun kwayoyi a jihar Kano.

“Wannan aiki mafari ne. Za mu ci gaba da zage damtse wajen ganin al’ummominmu sun kubuta daga bala’in haramun domin samun al’ummar da ba ta da muggan kwayoyi,” inji shi.

Mista Idris-Ahmad ya yi kira ga jama’a da su bayar da bayanan da za su iya taimaka wa hukumar ta NDLEA wajen yaki da fataucin miyagun kwayoyi da shaye-shayen miyagun kwayoyi.

Ya kuma umarci jama’a da su kai rahoton abubuwan da ake tuhuma ko kuma mutanen da ke da hannu wajen aikata laifukan da suka shafi muggan kwayoyi zuwa ofishin hukumar NDLEA mafi kusa ko ta hanyar layin taimako na hukumar – 0800 1020 3040.

“Za mu ci gaba da hada kai da gwamnatin jihar Kano da shugabannin al’umma da masu ruwa da tsaki da sauran al’umma domin yakar shaye-shayen miyagun kwayoyi,” Mista Idris-Ahmad ya kuma tabbatar.

NAN