Yan sanda sun kama shugaban makarantar bisa zargin yi wa wata daliba bulala da kuma raunata

DAGA YASIR SANI ABDULLAHI

Rundunar ‘yan sanda ta cafke wani  shugabar makarantar sakandare a unguwar Igando da ke Legas bisa zargin yi wa wata daliba bulala da kuma raunata a jikinta.

Kakakin rundunar ‘yan sandan, SP Benjamin Hundeyin,  ne ya  shaidawa Kamfanin Dillancin Labarai na Najeriya NAN a ranar Asabar cewa rundunar ‘yan sandan Igando ta dauke shugaban makarantar a ranar Juma’a domin yi masa tambayoyi.

Hada Layuka Da NIN: Kamfanin Sadarwa Na MTN Ya Kulle Layukan Mutum Miliyan 4.2 A Nijeriya

Hundeyin ya ce ma’aikatar ilimi ta jihar Legas ita ma ta sa baki a lamarin, da nufin a binciki shugaban makarantar, tare da gurfanar da shi gaban kuliya, idan aka same shi da laifi.

Daily News24 ta ruwaito cewa wani faifan bidiyo ya bayyana a yanar gizo wanda ke nuna wata daliba da alamomi a jikinta, wanda ake zargin an yi mata bulala.

Hakan ya sa kwamishinan ‘yan sanda na jihar Legas, kwamishinan ilimi, da kwamishinan matasa da ci gaban al’umma su sa baki a kan lamarin.