Hilda Baci Ta Dafa Buhu 200 Na Shinkafa A Yunƙurin Kafa Sabon Tarihi

Fitacciyar mai girki ta Nijeriya, Hilda Effiong Bassey, wadda aka fi sani da Hilda Baci, ta sake jan hankalin duniya bayan ta dafa buhun shinkafa 200 a wani yunƙuri na kafa sabon tarihi a duniya.

An gudanar da wannan gagarumin girki ne a fili a birnin kasuwanci na Legas, inda Hilda ta shafe awa takwas tana dafawa. Wannan ya jawo daruruwan jama’a da suka taru domin kallon abin da ke faruwa tare da ɗaukar hotuna da bidiyo.

Ambaliyar Ruwan Sama Ta Ɗaiɗaita Yara 470, Ta Lalata Gidaje 270 A Zariya

A girkin, Hilda ta yi amfani da shinkafa mai nauyin kilo 4,000, katan 500 na tumatir, kilo 600 na albasa, da sauran kayan haɗi.

Hilda ta shahara a shekarar 2023, lokacin da ta shiga kundin Guinness World Records bayan shafe awa 93 da mintuna 11 tana girki ba tare da tsayawa ba.

Sai dai, kamar yadda aka saba, dole ne Guinness World Records su gudanar da bincike da tantancewa kafin su tabbatar da cewa Hilda ta kafa sabon tarihi.

Dafa-dukar shinkafa, wanda aka fi sani da jollof rice, abinci ne da ake sha’awa a ƙasashen Yammacin Afirka. Nijeriya, Ghana, Senegal, Kamaru da Gambiya duk suna da’awar cewa su ne suka fi kwarewa a dafawa.

A shekarar 2023, UNESCO ta amince da Senegal a matsayin inda wannan abinci ya samo asali, daga jama’ar Wolof.

TRT GLOBAL