Majalisar Dokoki Ta Amince Da Shirin Kirkirar Sabbin Jihohi Shida A Najeriya

Kwamitin haɗin gwiwa na Majalisar Dokokin Tarayya mai kula da sake duba kundin tsarin mulki ya amince da shirin ƙirƙirar sababbin jihohi guda shida, wanda zai ƙara yawan jihohin ƙasar daga 36 zuwa 42 idan aka kammala aiwatar da shi.

Wannan hukunci yana daga cikin muhimman matsayai da aka cimma a ƙarshen taron kwanaki biyu da aka gudanar a Legas, ƙarƙashin jagorancin Mataimakin Shugaban Majalisar Dattijai, Barau I. Jibrin, da Mataimakin Kakakin Majalisar Wakilai, Benjamin Kalu.

Ƙungiyar Likitoci Ta Umarci Mambobinta Da Su Tsunduma Yajin Aiki A Faɗin Najeriya

A cewar wata sanarwa da aka fitar bayan taron, kwamitin ya tattauna kan ƙudurorin gyaran kundin tsarin mulki guda 69, ciki har da buƙatun ƙirƙirar sababbin jihohi 55, buƙatu biyu na gyaran iyaka, da aikace-aikacen ƙananan hukumomi 278.

Bayan tattaunawa a ranar Asabar, ƴan majalisa sun amince cewa a ƙirƙiri sabuwar jiha ɗaya daga kowanne yanki na siyasa guda shida a Najeriya, wato: Arewa maso Yamma, Arewa maso Gabas, Arewa ta Tsakiya, Kudu maso Yamma, Kudu maso Gabas, da Kudu maso Kudu.

Idan majalisun biyu na dokoki suka amince da shirin, kuma majalisun dokoki na jihohi suka tabbatar da shi, to yankin Arewa maso Yamma zai samu jihohi 8, Arewa maso Gabas 7, Arewa ta Tsakiya 7, Kudu maso Yamma 7, Kudu maso Kudu 7, yayin da Kudu maso Gabas zai kai jihohi 6.