Yan Najeriya Sama Da 1,000 Aka Hallaka  A Cikin Watanni Biyu — Peter Obi

Tsohon ɗan takarar shugaban ƙasa na jam’iyyar Labour Party a zaɓen 2023, Peter Obi, ya ce akalla ’yan Najeriya sama da mutum 1,000 aka kashe tsakanin watan Janairu da Fabrairun 2026.

Ya kuma ce dubban mutane sun fada hannun masu garkuwa da mutane a daidai wannan lokaci, yana mai cewa yawan hare-haren da ake fuskanta a Najeriya ya fi na wasu ƙasashen da ke cikin yaƙi a hukumance.

Hanyoyi 5 da azumi ke inganta lafiyar dan Adam

Obi ya bayyana hakan ne a wani saƙo da ya wallafa a shafinsa na X a ranar Lahadi.

A cewarsa, hare-haren ’yan bindiga da sauran masu aikata laifuka sun shafi jihohi akalla 25, inda aka samu kashe-kashe, sace mutane da kuma lalata garuruwa.

Ya ce iyalai da dama sun yi asarar ’yan uwansu a jihohi irin su Zamfara State, Benue State, Plateau State da Ondo State, yayin da wasu jama’a da dama suka tsere daga gidajensu saboda fargabar hare-hare.

Obi ya soki shugabannin siyasa, yana zargin su da mayar da hankali kan shirye-shiryen zaɓen 2027 maimakon daukar matakan gaggawa don kare rayukan jama’a.

“Abin damuwa ne sosai ganin yadda ’yan siyasa ke ta shirye-shiryen zaɓen 2027, alhali an kashe ’yan Najeriya sama da 1,000 cikin watanni biyu kacal na 2026,” in ji shi.

Ya kara da cewa jagoranci na gaskiya ba wai cin zaɓe ba ne kawai, sai dai kare rayuka da mutuncin jama’a.

Obi ya jaddada cewa tarihi zai tuna da shugabanni ne bisa yadda suka ɗauki mataki wajen kare jama’a a irin wannan lokaci, ba wai dabarun siyasa kawai ba.

Aminiya