Titin Kiru–Yako Ya Zama Tarkon Mutuwa, Mazauna Yanki Sun Roƙi Gwamnatin Kano Ta Gaggauta Kammala Aikinsa

Mazauna Ƙaramar Hukumar Kiru, direbobin motocin haya, ‘yan kasuwa da sauran masu amfani da titin Kiru zuwa Yako sun bayyana damuwarsu kan jinkirin kammala aikin gyaran titin, lamarin da suka ce na jefa su cikin mawuyacin hali tare da ƙara haɗarin asarar rayuka da dukiyoyi.

Binciken da aka gudanar ya nuna cewa an fara aikin gina titin shekaru da suka gabata, amma har yanzu ba a kammala shi ba. A cewar mazauna yankin, aikin ya tsaya cik na wani lokaci, abin da ya sa masu amfani da hanyar ke ci gaba da fuskantar ƙalubale musamman a lokacin damina.

Majalisar Dattawa Ta Bukaci A Haramta Shigo Da Tufafi Da Aka Kera A Kasashen Waje

Wani direban mota mai suna Malam Abdullahi Kiru ya shaida wa manema labarai cewa lalacewar titin na haifar da matsaloli masu yawa ga direbobi da fasinjoji.

Ya ce ramuka da gurɓatattun sassan titin sun tilasta wa direbobi rage gudu da yin taka-tsantsan domin kauce wa haɗurra.

“Mummunan yanayin titin ya jawo mana matsaloli da dama. Muna tafiya a hankali domin kare rayukan fasinjoji da motocinmu. Ramukan da ke kan titin suna ƙara lokacin tafiya tare da tsadar sufuri,” in ji shi.

Malam Abdullahi ya kuma bayyana cewa wata gada da ke tsakanin Kiru da Yako da aka rushe yayin da aka fara aikin gyaran titin har yanzu ba a kammala sake ginata ba.

A cewarsa, hakan ya sa direbobi da matafiya ke amfani da wasu hanyoyi na daban domin kauce wa yankunan da ba a kammala aikin ba.

“Tun lokacin da aka rusa gadar domin gudanar da aikin gyara, har yanzu ba a kammala ta ba. Wannan ne ya sa muke amfani da tsohuwar hanyar Alhazawa domin samun sauƙin zirga-zirga,” ya ƙara da cewa.

Shi ma wani ɗan kasuwa, Malam Sani Tijjani, ya ce matsalar titin na yin tasiri kai tsaye ga harkokin kasuwanci da safarar kayayyaki a yankin.

“Halin da titin Kiru zuwa Yako yake ciki ya zama barazana ga rayuka da dukiyoyi. Muna kira ga gwamnatin jihar Kano da ta ɗauki matakin gaggawa domin kammala aikin, musamman yanzu da damina ke ƙara lalata hanyar,” in ji shi.

Rahotanni sun nuna cewa direbobi da dama na kauce wa amfani da titin idan aka yi ruwan sama saboda wahalar wucewa, rashin kammala gadar da kuma fargabar aukuwar haɗurra.

Sakamakon haka, mazauna yankin sun yi kira ga gwamnatin jihar Kano ƙarƙashin jagorancin Gwamna Abba Kabir Yusuf da ta gaggauta kammala aikin titin da kuma gadar domin sauƙaƙa zirga-zirga da bunƙasa tattalin arziƙin yankin.

A cewarsu, kammala aikin zai rage haɗurran mota, sauƙaƙa safarar kayayyaki, inganta harkokin kasuwanci tare da kare rayuka da dukiyoyin al’ummar da ke amfani da hanyar.