Kwamitin Ƙwadago Ya Ƙara Ƙaimi Kan Rijistar Katin Zaɓe, Daruruwa Sun Yi Rijista a Hotoro

Daruruwan ‘yan ƙasa da suka cancanci kaɗa ƙuri’a sun halarci shirin Rijistar Katin Zaɓe ta Dindindin (CVR) na kwanaki biyu da aka gudanar a Kwalejin Noma ta Tarayya da ke Hotoro a Jihar Kano, lamarin da ya ƙara nuna yadda ake samun nasara a yaƙin wayar da kan al’umma kan muhimmancin rajistar masu zaɓe.

Shugaban Kwamitin Ƙwadago na Kwamitin Aikin na Jihar Kano kan Rajistar Masu Zaɓe, Kwamared Abbas Ibrahim, wanda ya jagoranci sa ido kan gudanar da shirin, ya bayyana gamsuwarsa da yawan mahalarta, musamman ganin yadda aka samu manyan mutane da kuma matasa masu yin rajistar katin zaɓe a karon farko.

One Kano Agenda Ta Roki Majalisar Dokokin Kano Ta Binciki Gwarzo Kan Zargin Karkatar Da Naira Miliyan 308

Ya ce hakan wata babbar alama ce ta ƙara faɗaɗa dimokuraɗiyya da kuma bai wa duk wanda ya cancanta damar amfani da haƙƙinsa na tsarin mulki wajen zaɓar shugabanni.

A cewarsa, shirin ya samu halartar ma’aikatan gwamnati da masu zaman kansu, ma’aikata da ɗaliban Kwalejin Noma ta Tarayya da ke Hotoro, tare da al’ummar yankunan da ke makwabtaka da kwalejin.

Kwamared Abbas Ibrahim ya yaba wa jami’an Hukumar Zaɓe Mai Zaman Kanta ta Ƙasa (INEC) bisa ƙwarewa, jajircewa da kuma gudanar da aikinsu cikin tsari, yana mai cewa hakan ya taimaka matuƙa wajen samun nasarar shirin.

Ya kuma gode wa Kwamishinan Zaɓe na Jihar Kano, Ambasada Abdu A. Zango, bisa goyon bayan da ya bayar wajen tabbatar da tura jami’an INEC domin gudanar da aikin, ta hanyar jagoranci da haɗin gwiwar Kwamitin Aiki na Jihar Kano kan Rajistar Masu Zaɓe ƙarƙashin jagorancin Dr. Ibrahim Abdullahi Waiya.

Hakazalika, ya miƙa godiyarsa ga Shugaban Kwalejin Noma ta Tarayya da ke Hotoro, Dr. Salisu Salisu, tare da mahukuntan makarantar bisa samar da yanayi mai kyau da ya ba da damar gudanar da shirin cikin nasara.

Ya buƙaci duk waɗanda har yanzu ba su yi rajistar katin zaɓe ba da su yi amfani da damar da ta rage kafin rufe rajistar, yana mai tunatar da jama’a cewa za a kawo ƙarshen shirin CVR a ranar 10 ga Yuli, tare da ƙarfafa su su ziyarci ofishin INEC mafi kusa da su domin kammala rajistarsu.

Shugaban kwamitin ya kuma yabawa ɗaliban da suka taimaka wajen yi wa masu rajista rijistar farko ta yanar gizo, yana mai bayyana gudummawar da suka bayar a matsayin abin koyi ga sauran matasa.

Haka kuma, ya yaba da rawar da Sakataren Kwamitin, Kwamared Usman Bello, da Malam Aliyu Sani na Sakatariyar Kwamitin suka taka, inda ya ce sabbin dabaru da ingantaccen tsari da suka samar sun taimaka wajen samun nasarar shirin.

A ƙarshe, Kwamared Abbas Ibrahim ya tabbatar da cewa Kwamitin Ƙwadago zai ci gaba da wayar da kan al’umma kan muhimmancin rajistar masu zaɓe da karɓar Katin Zaɓe na Dindindin (PVC), tare da ƙarfafa ‘yan ƙasa su fito su shiga zaɓe domin ƙarfafa dimokuraɗiyya da tabbatar da cewa muryar jama’a ta kasance abin da ake la’akari da shi wajen tafiyar da mulki.