Mambobin Kungiyar Farfado Da Akidar Aminu Kano Sun Bayyana Rashin Gamsuwa Da Shugabancin Ƙungiya

Advertisements

Wasu mambobi biyar na Ƙungiyar Farfaɗo da Akidar Malam Aminu Kano sun bayyana rashin amincewarsu da shugabancin Alhaji Bakari Bako Tudun Nufawa.

Mambobin sun bayyana matsayinsu ne a wata sanarwa mai kwanan wata 14 ga Satumba, 2026, wadda ta samu sa hannun Umar Alhaji Alhassan, Kabiru Fagge, Garba Afarantis, Tijjani Hojo da H. Hanne Kofar Naisa.

Mutum 332 Sun Kamu Da Cutar Mashaƙo A Gombe

A cikin sanarwar, sun ce sun ɗauki matakin ne sakamakon damuwarsu kan yadda ake tafiyar da harkokin ƙungiyar da kuma yadda ake sarrafa albarkatunta.

Sun zargi shugabancin da rashin gaskiya da rikon amana wajen gudanar da al’amuran ƙungiyar, tare da bayyana cewa ba a isasshen tuntubar mambobi kafin yanke wasu muhimman shawarwari.

Haka kuma, sun yi zargin cewa ana ware wasu mambobi daga ayyukan ƙungiyar, yayin da kuma suke ganin akwai matsalar sadarwa tsakanin shugabanci da mambobin ƙungiyar.

Sun ce wasu daga cikin korafe-korafen da suka gabatar ba a magance su yadda ya kamata ba, abin da suka ce ya sa suka yanke shawarar bayyana matsayinsu a bainar jama’a.

Sai dai mambobin sun jaddada cewa matakin nasu ba shi da alaƙa da ƙiyayya ta kashin kai ko kuma ƙoƙarin raunana ƙungiyar, sai dai suna son a inganta yadda ake gudanar da shugabancinta.

Sun yi kira da a bi kundin tsarin mulki da ƙa’idojin ƙungiyar wajen magance lamarin, ciki har da kiran taro da zai bai wa mambobi damar tattaunawa tare da kada kuri’a kan ƙudirin rashin amincewa da shugaban.

Sun kuma buƙaci shugabannin ƙungiyar su mutunta haƙƙin mambobi, tare da tabbatar da cewa duk wani mataki da za a ɗauka zai gudana cikin lumana, gaskiya da adalci.

Mambobin sun ce burinsu shi ne ganin ƙungiyar ta samu haɗin kai da ci gaba, suna mai cewa suna neman ƙarfafa ta ne ta hanyar ingantaccen shugabanci, rikon amana da adalci.