NDLEA Ta Kama Matar Da Ta Ɓoye Tabar Wiwi A Cikin Galan Mai A Kano

Jami’an Hukumar Hana Sha da Fataucin Miyagun Ƙwayoyi ta Ƙasa (NDLEA) sun kama wata mata mai suna Fatimah Ahmad bisa zargin yunƙurin safarar tabar wiwi da aka ɓoye a cikin galan mai, yayin da take shirin tafiya Saudiyya ta filin jirgin saman Malam Aminu Kano.

An kama matar ne a ranar Juma’a, 16 ga Oktoba, 2026, yayin binciken fasinjojin wani jirgin saman Ethiopian Airlines da zai tashi zuw7a Jiddah ta birnin Addis Ababa na ƙasar Habasha.

AMATA Ta Yi Wa Abba Kabir Yusuf Fatan Nasara, Ta Tabbatar da Goyon Bayanta Ga Gwamnatinsa

Hukumar ta ce an gano tabar wiwi mai nauyin gram 511.75 a cikin galan ɗin mai da matar ke ɗauke da shi.

A cewar NDLEA, matar ta bayyana cewa ɗan uwanta mai suna Abubakar Yahaya ne ya ba ta galan ɗin, lamarin da ya kai ga kama shi a filin ajiye motocin filin jirgin saman.

A wani samame na daban da hukumar ta gudanar a tashar jiragen ruwa ta Apapa da ke Legas, an gano kilogram 8,725 na tramadol a matsayin hoda, wanda darajarsa ta haura naira biliyan 6.98 a kasuwar miyagun ƙwayoyi.

Haka kuma, hukumar ta ce ta kama wata tsohuwa mai shekara 85 a Jihar Edo, tare da gudanar da wasu samame da suka kai ga cafke waɗanda ake zargi da ƙwace miyagun ƙwayoyi a jihohin Ondo, Bauchi, Kano da Kaduna, da kuma Babban Birnin Tarayya Abuja.

NDLEA ta bayyana cewa waɗannan samame na daga cikin ƙoƙarin da take yi na yaƙi da safarar miyagun ƙwayoyi da kuma dakile hanyoyin da ake bi wajen shigar da su cikin ƙasar ko fitar da su zuwa ƙasashen waje.

Sai dai, waɗanda aka kama ana ɗaukar su a matsayin waɗanda ake zargi, har sai kotu ta tabbatar da laifinsu bisa tanadin doka.

PUNCH