Mutanen Gari Sun Hallaka ’Yan Bindiga Sama Da 30 A Zamfara

Advertisements

Mazauna Birnin Tudu sun ce sun kwashe kwanaki uku suna fafatawa da mahara, sun nemi gwamnati ta ƙara musu jami’an tsaro da kayan aiki.

Mazauna garin Birnin Tudu da ke Ƙaramar Hukumar Gummi a Jihar Zamfara sun ce sun kashe sama da ’yan bindiga 30 yayin fafatawar da ta ɗauki kwanaki uku bayan mahara ɗauke da makamai sun kai musu hari.

Karya Darajar Naira Da Tinubu Ya Yi Ya Kara Jefa ‘Yan Najeriya Cikin Talauci —Olusegun Obasanjo

Mazauna garin sun bayyana cewa ɗaruruwan ’yan bindiga ne suka kewaye garin a kan babura, inda suka riƙa harbe-harbe tare da fasa shaguna da kwashe kayayyaki.

Wani mazaunin garin, wanda ya nemi a sakaya sunansa, ya ce maharan sun kai harin ne da misalin ƙarfe 10 na safe ranar Talata, lokacin da da dama daga cikin mazauna garin suka fita gonakinsu domin girbe amfanin gona.

A cewarsa, maharan sun zo ba-zata, inda suka kewaye garin ta ɓangarori daban-daban kafin jama’a su fahimci abin da ke faruwa.

Ya ce maharan sun zo da babura sama da 100, inda kusan mutum uku ke kan kowane babur.

Mazaunin ya bayyana cewa mazauna garin sun yanke shawarar tunkarar maharan domin kare rayukansu da dukiyoyinsu maimakon guduwa su bar gidajensu.

Ya ce a yayin fafatawar, mazauna garin uku sun rasa rayukansu, wasu uku kuma suka samu raunuka, ciki har da mutum guda da ya samu raunin harbin bindiga.

Ya ƙara da cewa maharan sun sake dawowa karo na biyu, amma mazauna garin sun sake tunkararsu har suka fatattake su zuwa gabashin garin.

Wani mazaunin garin ya ce bayanai daga baya sun nuna cewa adadin ’yan bindigar da aka kashe ya haura 30, duk da cewa da farko mazauna garin sun ƙirga gawarwaki 11.

Ya ce maharan sun hana su kwashe wasu makamai da suka rage a wurin bayan wasu ’yan bindiga sun sake kai musu hari.

A cewarsa, maharan sun kuma yi nasarar tafiya da shanun da suka sace daga wasu garuruwan da ke makwabtaka da Birnin Tudu, amma ba su sace dabbobin garin ba.

Ya ƙara da cewa baya ga mutanen garin uku da aka kashe, an kuma samu rahoton mutuwar wasu mutane a wajen garin da kuma Ɗantsullutu.

Mazauna garin sun musanta rahotannin da ke cewa wani shugaban ’yan bindiga da ake kira Gwaska ne ya kai harin saboda al’ummar garin sun ƙi amincewa da gudanar da haƙar zinare a yankin.

Sun ce babu wata hujja da ta tabbatar da wannan ikirari, suna mai jaddada cewa ba su da niyyar barin gidajensu saboda barazanar ’yan bindiga.

Da aka tuntubi kakakin rundunar ’yan sandan Jihar Zamfara, DSP Yazid Abubakar, ya tabbatar da faruwar harin, inda ya ce rundunar ta ƙara tsaurara matakan tsaro domin kare al’ummar yankin.

Sai dai rundunar ta fayyace cewa ba a kai hari wani garin Birnin Tudu da ke Ƙaramar Hukumar Anka ba, tana mai cewa akwai ƙauyuka biyu masu wannan suna a jihar.

Kwamandan ’yan banga na Birnin Tudu da ke Ƙaramar Hukumar Gummi, Bello Abubakar, wanda aka fi sani da Bello Karo Birnin Tudu, ya yi kira ga hukumomin tsaro da gwamnatin ƙaramar hukumar da su samar musu da ƙarin jami’an tsaro da kayan aiki.

Ya ce sun samu bayanan sirri tun ranar Litinin cewa wasu ’yan bindiga masu yawa na shirin zuwa yankin, amma harin ya faru ne a safiyar Talata, lokacin da yawancin mazauna garin suka fita gonakinsu.

A cewarsa, ’yan banga da mazauna garin sun shafe kwanaki uku suna ƙoƙarin kare al’ummar yankin daga hare-haren.

Ya ce suna fargabar cewa maharan za su iya sake dawowa domin ɗaukar fansa, saboda haka ya buƙaci gwamnati ta samar musu da motar sulke da ƙarin jami’an tsaro.

Ya kuma roƙi shugaban Ƙaramar Hukumar Gummi, Aminu Falale, da ya taimaka wajen samar da kayan aikin tsaro, ciki har da fitilun hannu da sauran kayan da za su taimaka musu wajen kare garin.

Ya ce kayan aikin da suke da su sun yi ƙaranci sakamakon fafatawar da suka yi da maharan na tsawon kwanaki uku.

Yunkurin wakilinmu na jin ta bakin shugaban ƙaramar hukumar bai yi nasara ba, domin ya ƙi yin bayani ta waya, inda ya nemi a je a same shi da kansa.

Haka kuma, ƙoƙarin jin ta bakin ɗan majalisar dokokin jihar mai wakiltar yankin, Adamu Aliyu Gazura, bai yi nasara ba saboda ba a samu damar shiga ta lambobin wayarsa ba.

Lura: Adadin ’yan bindigar da aka kashe ya fito ne daga bayanan mazauna garin; ba a samu tabbaci mai zaman kansa kan adadin ba.