Hajjin 2024: NAHCON ta sanar da ranar fara jigilar maniyyata zuwa kasar Saudiyya

DAGA YASIR SANI ABDULLAHI 

Hukumar Alhazai ta Najeriya NAHCON a ranar Alhamis ta ce za a fara jigilar maniyyata zuwa kasar Saudiyya a ranar 15 ga watan Mayu.

Shugaban Hukumar NAHCON, Malam Jalal Ahmad Arabi ne ya bayyana haka a jawabinsa na bude taron masu ruwa da tsaki na bangaren Hajji da Umrah na Najeriya na farko da aka gudanar a cibiyar Shehu Musa Yar’adua da ke Abuja.

Karnuka Sun Cinye Sassan Jikin Jaririya sabuwar haihuwa da aka jefar a Kano 

Arabi ya sanar da cewa, kusan mahajjatan Najeriya 65,500 ne za su halarci aikin Hajjin shekarar 2024, inda ya kara da cewa kamfanonin jiragen sama da aka amince da su za su dauke su daga cibiyoyi 10 na tashi da saukar jiragen sama na kasar.

Shugaban Hukumar NAHCON ya ce hukumar ta yanke shawarar cewa a gudanar da ayyukan na bana, dukkan alhazan Najeriya za su ziyarce su kuma su shafe akalla kwanaki hudu a Madina kafin a fara aikin Hajjin yadda ya kamata.

Da yake magana kan taron, Arabi ya ce haduwar masu ruwa da tsaki wani nauyi ne da Allah ya dora wa kowa, yana mai cewa taken taron, “Hadin kai da Aiki: Tattalin Arzikin Nasara na ayyukan Hajji na 2024” an zabi shi cikin tsanaki.

Ya ce hukumar alhazan ta ga ya dace ta tattauna da masu ruwa da tsaki domin ganin an samu nasarar gudanar da aikin Hajjin bana.

Ya kara da cewa yana da kyau duk masu ruwa da tsaki su hada kai domin alhazai su samu gogewar aikin hajji a bana.