Zamfara ta baiwa Jamhuriyar Nijar tallafin motoci domin a magance tsaro

DA DUMI-DUMI: Zamfara ta baiwa Jamhuriyar Nijar tallafin motoci domin a magance tsaro

Gwamnatin jihar Zamfara ta baiwa gwamnatin Jamhuriyar Nijar tallafin sabbin motoci kirar Hilux guda biyar domin aikin sintiri na musamman kan iyakokin kasar.

Hakan na kunshe ne cikin wata sanarwa da aka fitar a Gusau ranar Asabar mai dauke da sa hannun sakataren yada labaran gwamna Bello Matawalle, Jamilu Birnin-Magaji.

Mista Birnin-Magaji ya ce tallafin ya kasance cika alkawarin da Mista Matawalle ya yi na tallafa wa kasar nan da motocin sintiri da sauran kayan aikin tsaro a yakin da ake yi da ‘yan fashi.

“Gwamna Matawalle ne ya mika motocin ga gwamnan jihar Maradi, Alhaji Abubakar Shu’aibou, a wani biki da aka gudanar a gidan gwamnati dake Gusau.”

Gwamnan ya ce motocin za su ba da aikin sintiri na musamman a kan iyaka a Maradi da sauran sassan Jamhuriyar Nijar da ke kan iyaka da Zamfara, Katsina da Sokoto.

Da yake mayar da martani, gwamnan yankin Maradi, Abubakar Shu’aibou, ya tabbatar wa Matawalle cewa za a yi amfani da motocin ne wajen yakar ‘yan bindiga da “sauran munanan laifuka musamman a kan iyakar Maradi.”

Idan za a iya tunawa, a watan Disambar 2021, Mista Matawalle ya ziyarci Shugaba Mohamed Bazoum na Jamhuriyar Nijar a Yamai, inda shugabannin biyu suka kuduri aniyar duba wasu bangarorin hadin gwiwa.

(NAN)