HAJJIN 2026: Sama Da Maniyyata 1,000 Sun Rasa Bizar Zuwa Hajji A Kaduna

Hukumar Jin Daɗin Alhazai ta jihar a Kaduna ta bayyana cewa kimanin maniyyata 1,010 ne suka rasa damar samun bizar zuwa aikin Hajjin 2026, sakamakon rage yawan kujerun da aka bai wa Najeriya.

Shugaban hukumar, Salihu Abubakar, ne ya bayyana hakan yayin wata ganawa da manema labarai a hedikwatar hukumar.

Iran ta bayyana tayin Trump kan tsagaita wuta a matsayin rashin kunya

Ya ce rage guraben daga hukumomin Saudiyya ya tilasta wa National Hajj Commission of Nigeria soke ƙarin kujerun da aka ware wa jihar Kaduna tun da farko.

> “Mun samu damar fitar da biza ne kawai ga waɗanda suka cika sharuddan rajista kafin wa’adin, waɗanda yawansu ya ɗan haura 1,600,” in ji shi.

A cewar shugaban, da farko an yi tunanin amfani da tsarin “wanda ya fara zuwa shi za a fara ba dama”, amma daga baya aka ba fifiko ga waɗanda suka kammala biyan kuɗin Hajji tare da miƙa fasfo dinsu cikin lokaci.

Ya ƙara da cewa wannan mataki ya taimaka wajen kauce wa matsalolin da ka iya tasowa sakamakon ƙarancin gurabe.

Rahotanni sun ce National Hajj Commission of Nigeria ta riga ta maida wa jihar kuɗaɗen maniyyatan da ba su samu bizar ba, domin a mayar musu.

Hukumar ta jihar ta tabbatar da hakan, tana mai cewa za a tabbatar an mayar da kuɗaɗen ga duk wanda abin ya shafa.

Rage guraben Hajji da ake bai wa ƙasashe na ci gaba da shafar maniyyata, musamman a Najeriya, inda yawan masu son zuwa aikin Hajji ke ƙaruwa a kowace shekara.

PREMIUM TIMES