Shugaba Buhari Ga Najeriya: Ba Zan Huta Ba Har Sai An Samu Zaman Lafiya a Kasar Nan.

Daga Muhammad Muhammad zahraddin 

Shugaban kasa Muhammadu Buhari ya ce gwamnatinsa ba za ta yi kasa a gwiwa ba wajen kokarin dawo da zaman lafiya da kwanciyar hankali a kasar nan.

Buhari ya bayyana haka ne yayin bikin cika shekaru 58 da kafa rundunar sojojin saman Najeriya a nan Kano.

TAKARAR SHUGABAN ƘASA 2023: Mutum biyar kaɗai ke da gaske a cikin APC, sauran ‘yan rakiyar amarya ne -Gwamna Fayemi

Shugaban ya ce zuba jarin da gwamnatinsa ta yi a rundunar sojin sama ya taimaka wajen karya lagwon ‘yan ta’adda a kasar nan.

Ya yi alkawarin cewa, zai ci gaba da bai wa sojin sama goyon baya da ya dace a yaki da rashin tsaro da kasar nan ke fuskanta.

Ya kuma ce gwamnatin sa baza ta gushe ba, har sai ta samar da ingantaccen tsaro a fadin kasar nan.

Kazalika Shugaba Muhammadu Buhari ya sadu da iyalan da suka rasa rayukansu sakamakon fashewar da aka samu a unguwar Sabon Gari a makon da ya gabata.

Shugaban ya jajanta wa iyalan mutanen da wannan hatsari ya rutsa da su da Mai Martaba Sarkin Kano da kuma gwamna kan wannan lamari.