Gwamnatin Najeriya na fatan haɓaka hada-hadar cikin ƙasa zuwa dala tiriliyan 12

DAGA YASIR SANI ABDULLAHI 

Gwamnatin Najeriya ta ce tana fatan cimma dala tiriliyan 12 a matsayin darajar dukiyar da ake samarwa a cikin ƙasar (GDP) da kuma dukiyar da ‘yan ƙasar ke samu nan da 2050.

Ministar Kuɗi Zainab Ahmed ta faɗa ranar Juma’a a Abuja cewa an yi hasashen cimma wannan adadi ne idan adadin dukiyar Najeriyar ta cikin gida ya ci gaba da haɓaka da kashi 7 cikin 100.

Yan bindiga sun kwashe mazajen wani kauye dake Zamfara

“Za a iya cimma wannan adadi mai girman gaske ne kawai idan masu ruwa da tsaki suka ƙirkiri hanyoyin koyarwa ingantattu a faɗin Najeriya ta hanyar zuba jari kamar yadda aka tsara a Tsari na Ƙasa,” in ji ta.

Da yake tana magana ne a wurin taron neman hanyoyin kafa cibiyoyin ilimi masu ƙwari, ministar ta ce gwamnati ta fara wani shiri na gina makarantu ta hanyar haɗin gwiwa da EEG a 2021 da zimmar kare makarantun daga hare-haren ‘yan bindiga.

Ta ce yunƙurin ya sa an fito da “Tsari na Ƙasa”, wanda ake sa ran aiwatarwa tsakanin 2023 da 2026 da kuɗi naira biliyan 144.8.