Za’a Hana Masu Layin Glo Kiran MTN — Hukumar NCC

DAGA MUHAMMAD MUHAMMAD ZAHRADDIN

Masu amfani da layin Glo ba za su iya kiran layukan MTN ba a Najeriya nan ba da jimawa ba.

Hakan ya biyo bayan amincewar da Hukumar Sadarwa ta Najeriya NCC ta yi na yanke huldar Glo daga wani bangare na kamfanin sadarwa na MTN Nigeria saboda rashin daidaito na cajin kudi tsakanin kamfanonin biyu.

Badakalar N585m: Tambayoyin da suka wajaba Akanta Janar ta amsa

A wata sanarwa da hukumar ta fitar a ranar Litinin mai dauke da sa hannun Daraktan Sashen Hulda da Jama’a na NCC, Reuben Muoka, Hukumar ta ce a karshen kwanaki 10 daga ranar da aka fitar da sanarwar, masu amfani da Glo ba za su iya yin kira zuwa ga MTN ba amma masu MTN zasu iya kiran Glo, haka zalika masu Glo za su iya kiran sauran layuka”.

KU KARANTA: DA DUMI-DUMI: Kotun ƙoli Ta Tabbatar Da Nasarar Gwamna Alia Na Benue

Sanarwar ta ci gaba da cewa, “Hukumar Sadarwa ta Najeriya ta sanar da jama’a da masu amfani da layin Glo cewa an ba da izinin cire haɗin Glo daga MTN saboda rashin daidaita cajin kudi.

“An sanar da Glo aikace-aikacen da MTN ya yi, kuma an ba shi damar yin tsokaci da bayyana lamarin. Hukumar, bayan ta bincika aikace-aikacen da yanayin da ke tattare da bashin, ta ƙaddara cewa Globacom ba shi da isassun dalilai na kin biyan kuɗin haɗin gwiwar.

“Saboda haka ana buƙatar duk masu biyan kuɗi da su lura cewa: Hukumar ta amince da katse haɗin Glo zuwa MTN a ƙarƙashin sashe na 100 na dokar sadarwa ta Najeriya, 2003 da sakin layi na 9 na ƙa’idojin da aka tsara don ba da izini don katse haɗin gwiwar ma’aikatan sadarwa. 2012.

“A karshen kwanaki 10 daga ranar da wannan sanarwar ta fito, masu amfani da Glo ba za su iya yin kira zuwa MTN ba amma za su iya Kiran sauran layuka, amma Masu MTN zasu iya kiran layin Glo.