Shinkafar waje da taliya sun Fara karyewa a wasu daga cikin kasuwannin nigeria 

DAGA YASIR SANI ABDULLAHI

Farashin masara dai na ci gaba da cin karensa babu babbaka a sassan kasuwannin kasar Najeriya musamman a jihar Legos da ke kudancin kasar, inda a makon nan ake sai da buhunta a kan kudi N108,000, an samu karin N3000 kenan kan farashin makon da ya gabata da aka sai da N105,000 a kasuwar Mile 12 International Market Lagos.

Sai Kasuwar Mai’adua jihar Katsina aka sai da buhun masara N98,000 a satin nan, amma satin da ya shuɗe N95,000, nan ma an samu karin N3,000 a sati guda.

Tom dai a wannan makon ma Shinkafar waje tayi tsada a kasuwar Dawanau jihar Kano da ake saidawa N95,000 a wannan makon, yayin da a makon jiya aka saya N90,000.

Sai dai shinkafar Bature ta fi sauki a kasuwar Mile 12 International Market Legos da ke kudancin Najeriya da aka saya N78,000, amma a satin da ya kare N80,000 cif aka sai da buhun.

A kasuwar Giwa jihar Kaduna an sayi buhun Shinkafar waje N88,000 a makon jiya, amma a satin nan N86,000 ake sai da buhun, an samu sauƙin N2000 kenan a sati guda.

Tom a Jahar Adamawa kuwa anasaida shinkafar N78,000 aka sai da buhun shinkafar waje a kasuwar Zamani a makon nan, haka aka sai da a makon da ya gabata. Kamar Yadda DCL Hausa ta rawaito

Ga masu cin garau-garau ko alala koma kosai, farashin wake fari N250,0000 ne a kasuwar Mile 12 International Market Legos a makon nan, haka yake a satin da ya gabata.

N180,000 ake sai da buhun farin wake a kasuwar Giwa jihar Kaduna a satin nan, farashin dai bai sauya ba da na makon jiya.

To jihar Adamawa N170,000 daidai ake sayar da Buhunta a satin nan da ke shirin karewa, inda a makon jiya aka saya N165,000.

Ita kuwa kasuwar Dawanau jihar Kano an sayi buhun wake kan kudi N178,0000 a satin nan,sai dai N170,000 cif aka sai da Buhunta a makon daya shude.

To a kasuwar Mai’adua jihar Katsina N180,000 ake sayar da Buhunta a satin nan da ke dab da ƙarewa, bayan da a makon daya gabata aka saya N175000 zuwa 180,000.

Farashin taliya ma dai ya fi tsada a kasuwar Mile 12 International Market Legos da aka sai da kwalin N18,000 a satin nan, hakan kuwa aka sai da a satin da ya gabata.

A jihohin Adamawa da Kaduna N17,500 ake sayar da kwalin taliya,sai dai a makon jiya N16,000 cif ake sayar da kwalinta a kasuwar Zamani da ke jihar Adamawa, yayin da a kasuwar Giwa jihar Kaduna aka saya N15,000 daidai.

To a jihar Katsina kwalin taliyar ya kara N500 a satin nan da aka sai da N16,000, inda a makon jiya kuwa aka saya N15,500.

To sai dai farashin kwalin taliyar ya ki sauki a kasuwar Dawanau da ke jihar Kano da ake saidawa N14,000 a satin nan,yayin da a makon jiya aka sayeta akan N16,000 cif,an samu sauƙin N2000 kenan a wannan makon.