Taron Jin Ra’ayin Jama’a Kan Sauya Kundin Tsarin Mulki: Sanata Barau Na Jagorantar Yunkurin Kawo Sauyi

DAGA ABBA ANWAR – KANO

Mataimakin Shugaban Majalisar Dattawa, Sanata Barau I. Jibrin, wanda ke jagorantar kwamitin majalisar kan sauya kundin tsarin mulki na 1999, ya bayyana cewa akwai shirye-shiryen gudanar da tarukan jin ra’ayin jama’a a fadin Najeriya a ranakun 4 da 5 ga watan Yuli 2025.

A cewar Sanata Barau, tarukan na da nufin baiwa ‘yan kasa damar bayyana ra’ayoyinsu kan sauye-sauyen da ake shirin yi a kundin tsarin mulki.

Farfesa Gwarzo Ya Taya Tsohon Gwamnan Bauchi, Adamu Mu’azu, Murnar Cika Shekaru 70

Kwamitin ya ce yana kokari wajen samar da tsarin da zai karbi ra’ayoyi daga dukkan sassan Najeriya ba tare da nuna bambanci ba.

BATUTUWAN DA ZA A TATTAUNA

A cikin batutuwan da kwamitin zai mayar da hankali a kansu, akwai:

1. ‘Yancin kananan hukumomi:

Kudurori da dama na neman bai wa kananan hukumomi cikakken ‘yancin cin gashin kansu da kafa sabuwar hukumar zabe ta gundumomi. Wannan zai takaita ikon gwamnoni na rike shugabancin kananan hukumomi.

2. Sauye-sauyen shari’a:

Fiye da kudurori 20 ne ke neman gyara tsarin shari’a da hada da kayyade lokacin yanke hukunci da kara ikon sauraron karar zabe.

3. Kafa sabbin jihohi:

Kwamiti ya ce ya karbi bukatun kafa sabbin jihohi guda 31 daga dukkan yankunan kasar nan.

4. Tsaro da ‘yan sandan jihohi:

Akwai kudurori da ke neman kafa ‘yan sandan jihohi da kwamitocin tsaro a matakin jihohi don inganta tsaro da hadin kai tsakanin al’umma da jami’an tsaro.

5. Sauye-sauyen tsarin kudi:

Akwai kudurori shida da ke neman gyara yadda ake raba kudaden shiga da yadda ake gabatar da kasafin kudi da kuma tabbatar da gaskiya da bayyananniyar harkar kudi.

6. Wakilcin mata:

Akwai kuduri da ke neman kara yawan kujerun da mata ke rike da su a majalisar tarayya da ta jiha domin karfafa wakilcinsu.

7. Gyaran tsarin zabe:

Ana kokarin samar da dokokin da za su baiwa ‘yan takara marasa jam’iyya da ‘yan Najeriya mazauna kasashen waje damar kada kuri’a.

Fasahar zamani a harkar zabe

Marubucin ya bukaci a duba yiwuwar amfani da Artificial Intelligence (AI) a zabukan da za su zo nan gaba, yana mai cewa wasu kasashen duniya 50 sun riga sun yi amfani da wannan fasaha a zabukan 2024.

Rahoton da aka wallafa karkashin kungiyar International Panel on the Information Environment (IPIE) ya bayyana cewa kashi 80 cikin 100 na zabukan da aka gudanar a waccan shekara sun fuskanci matsaloli da suka shafi amfani da fasahar AI wajen kirkirar sakonni da hotuna da ke iya kawar da gaskiya a lokacin yakin neman zabe.

Kalaman Sanata Barau

Sanata Barau ya ce kwamitinsu a shirye yake don fitar da sakamakon da zai dace da bukatun ‘yan Najeriya.

“Mun shirya. Jama’a su sa rai ga sakamako mai ma’ana da zai amsa muradun su dangane da irin kundin tsarin mulkin da suke bukata,” in ji shi.

Taron jin ra’ayin jama’a dai ana sa ran zai taimaka wajen samar da tsarin mulki da ya fi dacewa da ‘yan Najeriya da kuma zaman lafiya da ci gaba a kasa baki daya.