Gwamnatin Kano za ta kashe Naira Biliyan 14.8 domin gudanar da manyan ayyuka

Majalisar Zartarwa ta Jihar Kano ta amince da kashe Naira biliyan 14.8 domin aiwatar da manyan ayyuka a fannoni daban-daban na raya jihar.

Kwamishinan Yaɗa Labarai na jihar, Malam Ibrahim Waiya, ya bayyana haka yayin zantawa da manema labarai jim kaɗan bayan zaman majalisar a ranar Juma’a.

INEC Za Ta Bai Wa Fursunoni Damar Kada Ƙuri’a A Lokacin Zaɓe

A cewar Kwamishinan, daga cikin kudaden da aka amince da su:

Naira miliyan 364 za a kashe wajen gyaran Asibitin Haihuwa na Sabo Bakin Zuwo da ke unguwar Jakara.

Naira miliyan 294 za a yi amfani da su wajen gyaran manyan gine-gine a Makarantar Koyar da Fasahar Lafiya ta Bebeji.

Naira miliyan 113 za a ware don girka na’urorin hasken rana a asibitocin haihuwa guda biyar a fadin jihar.

Sama da Naira miliyan 112 za a kashe wajen samar da magunguna da kayan aiki a Asibitocin Hasiya Bayero, Murtala Muhammad da Yadakunya.

Naira miliyan 272 za a yi amfani da su wajen gyara da sabunta wani gida da aka saya a unguwar Zango domin amfanin Asibitin Kwararru na Murtala Muhammad.

Naira miliyan 128 za su tafi wajen samar da kayan aiki ga dakunan asibiti guda biyu da aka gyara a Asibitin Koyarwa na Muhammad Abdullahi Wase.

Naira miliyan 379 za a kashe wajen gyaran ginin cibiyar kiwon lafiya ta farko a Zakirai tare da ƙara sabon gini a wurin.

Naira miliyan 169 za a ware domin gyaran ƙananan madatsun ruwa guda biyar a Madobi, Gwarzo, Garun Malam, Kibiya da Ajingi.

Waiya ya bayyana cewa matakan sun zama wajibi domin tabbatar da ci gaban al’umma, musamman a fannin kiwon lafiya, ilimi da samar da ababen more rayuwa a dukkan sassan jihar.