‘Yan Sanda Sun Cika Hannu Da Matar Da Ta Kona Fuskar ‘Yar Mijinta Da Tafasasshen Man Girki

Wata matar aure ta shiga hannu kan zargin ƙone fuskar ’yar mijinta, Fatima Talba mai shekara 17 da tafasasshen man girki, a unguwar Jiddari Polo da ke Jihar Borno.

Wata majiya ta tabbatar da cewa lamarin ya faru a ranar Asabar da ta gabata, bayan wata taƙaddama da kaure tsakanin Fatima da matar ubanta.

NECO 2025: Nasarar Ɗaliban Kano, Mai Cike Da Kalubale

“Matar ce ta kwara wa Fatima man girki mai zafi a fuska, wanda ya janyo mata mummunan ƙuna,” in ji majiyar.

An bayyana cewa Fatima na tare da mahaifinta a lokacin da suke shirye-shiryen aurenta da ake sa ran yi a nan gaba.

Bayan faruwar lamarin, an garzaya da ita Asibitin Koyarwa na Jami’ar Maiduguri (UMTH), inda ta ke kwance a sashen kulawa ta musamman.

“Halin da Fatima ke ciki ya tsananta, fuskarta ta ƙone sosai,” cewar majiyar.

Kakakin rundunar ’yan sandan Borno, Nahum Dado, ya tabbatar da cewa an kama matar da ake zargi da aikata laifin.

Jama’ar unguwar sun tausaya w Fatima baya tare da kira ga hukumomi da su tabbatar da an yi mata adalci.

AMINIYA