Ibrahim Little: Ɗan Siyasa Mai Gaskiya Da Kwarewa, Jagora Mafi Cancanta Da Zai Inganta Kano A 2027

DAGA ADNAN MUKHTAR, KANO

Ga matasan zamani, sunan Ibrahim Little na iya zama sabon abu a fagen siyasar Kano. Amma ga waɗanda ke sama da shekaru 30 — musamman cikin 40, 50, da 60 — sunansa ya daɗe yana fitowa a matsayin ɗaya daga cikin fitattun ‘yan siyasa masu kishin ƙasa da talakawa.

Ibrahim Little na daga cikin ‘yan siyasar Kano da suka shahara wajen jajircewa, himma, da hangen nesa, waɗanda suka sa sun zama abin koyi a fagen siyasa.

Kotu Ta Yanke Wa Barayin Kebil Hukuncin Shekara 2 Da Wata 10 A Kano

Sunan Little ya samo asali ne tun yana ɗan ƙuruciya, lokacin da yake mai tsaron raga a ƙungiyar ƙwallon ƙafa. Wannan kwarewa ta sa aka fi kiransa “Little,” wanda daga baya ya zama sanannen sunansa a siyasa.

Ya fara wasa da Kano Pillars, sannan ya koma Elkanemi Warriors na Maiduguri, inda ya shafe shekaru biyar yana buga wasa. Duk da cewa ya cika burinsa a wasa, ya rasa shiga Nigerian Defence Academy (NDA) saboda dagewa da ƙungiyar kwallo. A cewarsa, “ƙaddara ce,” yana mai nuna tawali’u da karɓar abin da ya shafe shi da imani.

A 2003, Ibrahim Little ya tsaya takarar gwamna a karkashin All Peoples Party (APP). A lokacin yana da shekara 39, ya lashe zaɓen fid-da-gwanin jam’iyyar da ƙuri’u sama da 850, inda ya doke Ibrahim Shekarau mai ƙasa da 160. Sai dai daga baya sunansa ya bace daga jerin ‘yan takara saboda tsoma bakin siyasa. Duk da haka, bai taɓa zargin kowa ba, yana cewa: “ƙaddara ce, lokacin Allah shi ne mafi alheri.”

A 2007, ya sake shiga takarar gwamna a PDP, inda ya zo na biyu bayan Rabiu Kwankwaso, duk da cewa bai cika shekara uku da shiga jam’iyyar ba. Abin takaici, an yi masa maguɗi a zaɓen fid-da-gwanin jam’iyyar.

Bayan shekaru, Ibrahim Little ya fice daga PDP zuwa African Democratic Congress (ADC) saboda rashin mutunta dimokuraɗiyya da rikice-rikicen cikin gida. A cewarsa:

“Rikice-rikicen shugabanci da rashin mutunta ka’idojin jam’iyyar sun lalata haɗin kan cikin gida. Ba zan iya ci gaba da kasancewa a PDP ba.”

Little ya kasance shugaba mai tsayayye, mai gaskiya, wanda ya dage a siyasar adawa tun daga zamanin APP, har zuwa yanzu a ADC.

An haife shi a Tudun Wada, Nassarawa, Kano. Ya yi karatu daga Tudun Wada Special Primary School, Rumfa College, da Wudil Commercial College, kafin ya samu digiri a fannin Accounting da MBA daga Ahmadu Bello University, Zaria. Har ila yau, ya halarci darussa a ƙasashen waje ciki har da London Business School.

Ibrahim Little yana da hangen nesa wajen inganta tattalin arziki, ilimi, lafiya, samar da ruwa da wutar lantarki, da kuma haɓaka masana’antun ƙanana. Ya sha bayyana cewa Kano na iya zama jihar da ta fi kowacce cigaba a Najeriya idan aka samu shugaba mai hangen nesa daga bangaren masu zaman kansu.

Yayin da zaɓen 2027 ke ƙaratowa, Ibrahim Little na fitowa fili a matsayin ɗan takara mafi cancanta a ADC. Jagora ne mai kwarewa, gaskiya, da hangen nesa, wanda zai iya jagorantar Kano zuwa sabon matakin ci gaba, In sha Allah.

Adnan Mukhtar

Malamin jami’a kuma mataimaki na musamman ga Alhaji Ibrahim Ali Amin Little Ya rubuta daga Kano