Sojoji Sun Dakile Harin Kwanton Bauna A Zamfara, Sun Hallaka ‘Yan Ta’adda Da Dama, Sun Rasa Jami’ai Shida

Rundunar Sojin Najeriya ƙarƙashin Operation FANSAN YAMMA (OPFY) ta ce ta dakile wani harin kwanton bauna da ‘yan ta’adda suka kai musu a kan hanyar Bingi–Kekun Waje–Gusau a jihar Zamfara.

A cewar rundunar, an kashe ‘yan ta’adda da dama, amma an rasa sojoji biyar da ɗan sanda guda ɗaya.

Wasu Gungun Ɓata Gari Sun Cinna Wa Wajen Sayar Da Kararen Gurasa Wuta A Rijiya Biyu Da Ke Dala A kano

Harin ya faru ne a ranar 19 ga Janairu, 2026, yayin da dakarun OPFY Combat Team 1 ke dawowa daga ayyukan share fage a yankunan da ake zargin ‘yan ta’adda ke buya.

Kyaftin David Adewusi, jami’in yaɗa labarai na OPFY, ya ce kwanton baunar ta biyo bayan hare-haren da rundunar ta kai tsakanin 17 zuwa 19 ga Janairu a ƙananan hukumomin Birnin Magaji da Anka, tare da haɗin gwiwar Sector 2 OPFY, Mobile Strike Team, da tawagar leƙen asiri ta soja (DIA).

Sanarwar ta ce sojoji sun kama mutane uku da ake zargin suna taimaka wa ‘yan ta’adda: Isiya Kwakwatawa, Ibrahim Dan Musulu, da Makau Lamba Goma.

An kashe ‘yan ta’adda huɗu, wasu kuma sun tsere zuwa dazukan makwabta.

Rundunar ta ƙwato makamai da kayayyaki da dama: bindigar PKT guda ɗaya, AK-47 guda biyar, majigi uku, alburusai 7.62mm, na’urorin sadarwa na Baofeng, da babura uku.

Rahotanni sun nuna cewa wasu shugabannin ‘yan fashi, ciki har da Janwuya da Alhaji Bello, sun samu munanan raunuka.

Sojoji da ‘yan sa-kai na yankin suna ci gaba da bibiyar waɗanda suka tsere.

Rundunar ta ce har yanzu ana kai hare-hare domin murƙushe su gaba ɗaya.

PRNIGERIA