Dakarun Soji Sun Ƙwato Zunzurutun Kuɗi Naira Miliyan 37 Da Za A Kai Wa Ƴan Bindiga A Borno

Dakarun rundunar haɗin gwiwar sojin Najeriya, Operation HADIN KAI, sun kwace kuɗi har naira miliyan 37 da ake zargin an shirya kai wa ‘yan ta’adda a yankin Arewa maso Gabashin Najeriya.

Dakarun Sojin sun kama kuɗin ne a wani shingen bincike da ke sansanin Forward Operating Base (FOB) Chabbal a jihar Borno, bayan sun tare wata mota mai ɗauke da mutane biyar — maza uku da mata biyu — da ake zargi da hannu a safarar kuɗaɗen.

‎Wasu Gungun Fusatattun Matasa Sun Kone Wanda Ake Zargi Da Satar Babur 

‎A cewar majiyoyin soji, an gano kuɗin da aka ɓoye a cikin jakunkuna, tare da wayoyin salula da dama da ake zargin suna da alaƙa da sadarwa da daidaita ayyukan ‘yan ta’adda.

‎Ana ci gaba da yi wa waɗanda aka kama tambayoyi, yayin da ake nazarin kayayyakin da aka ƙwato domin tattara bayanan sirri.

‎Jami’an soji sun bayyana cewa kwace kuɗin wani muhimmin mataki ne a ƙoƙarin lalata hanyoyin samun kuɗaɗen da ke tallafa wa ayyukan ta’addanci a yankin, ciki har da ƙungiyar ISWAP.

‎

PRNIGERIA