Adadin Falasdinawan Da Suka Rasu A Hare Haren Isra’ila A Gaza Ya Kai 72,991

Adadin Falasɗinawan da suka rasa rayukansu a hare-haren da Isra’ila ke kai wa Zirin Gaza tun bayan fara yaƙin a watan Oktoban 2023 ya kai mutum 72,991, a cewar majiyoyin kiwon lafiya na yankin.

Majiyoyin sun bayyana a ranar Talata cewa a cikin sa’o’i 24 da suka gabata, asibitocin Gaza sun karɓi gawarwakin mutum uku da suka mutu sakamakon hare-haren, yayin da wasu mutum biyar da suka jikkata suka samu kulawar likitoci.

A cewar jami’an lafiya, har yanzu akwai gawarwaki da dama da ke ƙarƙashin baraguzan gine-ginen da aka rusa, yayin da wasu ke kwance a wuraren da hare-haren suka afku saboda matsalolin da ke hana jami’an agaji da na kare fararen hula isa wuraren.

Rahotannin sun nuna cewa tun bayan fara aiki da yarjejeniyar tsagaita wuta a watan Oktoban 2025, mutane 981 sun mutu sakamakon hare-haren Isra’ila, yayin da wasu 3,104 suka jikkata.

Haka kuma, an ciro gawarwaki 783 daga ƙarƙashin baraguzan gine-gine a sassa daban-daban na Gaza tun bayan fara aiwatar da yarjejeniyar.

Yaƙin da ake yi a Gaza ya ci gaba da haifar da asarar rayuka mai yawa da kuma tabarbarewar yanayin jin kai a yankin, lamarin da ya sa ƙungiyoyin agaji da na ƙasa da ƙasa ke ci gaba da kira da a samar da mafita mai ɗorewa ga rikicin.

QNA.