Ashraf Mahrous Jarumin Ya Ja Jirgi Mai Nauyin Tan 700 Da Haƙoransa

Ashraf Mahrous, ɗan dambe daga ƙasar Masar, ya ja jirgi mai nauyin tan 700 (kimanin kilo 635,000) da haƙoransa a bakin tekun Hurghada da ke Bahar Maliya, abin da ya jawo hankalin duniya.

Mahrous, wanda ake kira “Kabonga” ko “Jarumi Mai Ƙarfi,” ya ce ya yi hakan ne domin kafa sabon tarihi a duniya.

Wata Budurwa Mai Shekaru 22 Ta Kashe Kanta Bayan Ta Ga Saurayinta Tare Da Wata Mace

“Na zo yau domin in kafa tarihi a duniya. Na jawo su duka da taimakon Allah,” in ji Mahrous bayan gwajin.

Jarumin mai shekaru 44 daga birnin Ismailia ya ce zai tura bidiyo da hotunan gwajin nasa zuwa Guinness World Records domin tabbatar da sabon rikodin. Tun yanzu, rikodin jan jirgin mafi nauyi shi ne tan 614, wanda aka kafa a shekarar 2018.

A watan Maris da ya gabata, Mahrous ya kafa rikodi na duniya wajen jan jirgin ƙasa mai nauyin tan 279 da igiya a cikin haƙoransa na tsawon mita 10, abin da Guinness ta tabbatar da shi a matsayin jan jirgin ƙasa mafi nauyi da mutum ya taɓa yi.

Tun shekarar 2022, Mahrous ya shahara bayan ya ja mota mai nauyin kilo 15,730 da haƙoransa. Don shiryawa wannan sabon ƙalubale, jarumin ya ce yana yin horon awanni shida a rana kuma abincinsa na kullum ya ƙunshi ƙwai 12, kaji biyu, da kilo biyar na kifi.

Mahrous, mai tsayin mita 1.9 da nauyin kilo 155, ya bayyana cewa tun yana ƙarami yake da ƙarfi, har ya taɓa karya hannun abokinsa yayin wasa.

Ya ƙara da cewa duk wannan ƙarfin ba daga magungunan ƙara ƙarfi yake samu ba, sai dai daga abinci mai kyau, bacci mai kyau, da motsa jiki sau biyu a rana.

Ashraf Mahrous na da ƙwarewa a kung fu, kickboxing, da dambe, kuma ya kafa ƙungiyar dambe a birnin Kahira. Abokansa ne suka shawarce shi ya nemi kafa tarihin duniya bayan sun ga yana juyar da tayar mota sau 10 a jere har ma yana tura mota da yatsa guda.