Federer ya sanar da yin murabus da ga wasan Tennis

DAGA MUHAMMAD MUHAMMAD ZAHRADDIN 

Shahararren dan wasan Tennis ɗin nan, Roger Federer, a yau Alhamis ya sanar da yin ritaya daga buga wasanni bayan kammala gasar cin kofin Laver mai zuwa.

Federer, wanda ya lashe kyautar Grand Slam sau 20, wanda magoya baya da dama ke ganin shi a matsayin zakaran ƴan wasan tennis na maza, ya kasance yana jiyya tsawon kakar wasan nan bayan tiyatar gwiwa da a ka yi masa.

Yan bindiga sun kai hari Batagawara a jihar Katsina in da suka sace mutane fiye da 50

Amma ana sa ran dan shekaru 41 zai yi murabus a 2023.

Sanarwar tasa na zuwa ne makonni kaɗan bayan da ƴar wasan tennis ta mata, Serena Williams ita ma ta sanar da murabus ɗin ta.

Federer ya ƙara da cewa: “Ni dan shekara 41 ne. Na buga wasanni sama da 1,500 sama da shekaru 24.

“Tennis ya min komai, fiye da yadda nake mafarki, kuma yanzu dole ne in gane lokacin da ya kamata in kawo ƙarshen sana’ata.”

A shekarar 2018 ne a gasar Australian Open Federer ya lashe kyautar Grand Slam ɗin sa ta karshe.