Amurka za ta bai wa Ukraine karin makaman yaki ciki har da atilare na miliyoyin daloli

DAGA KABIRU BASIRU FULATAN

Amurka ta sanar cewa za ta bai wa Ukraine karin tallafin kayan aikin sojoji na dala biliyan 1 da miliyan 100.

Tallafin dai zai kunshi karin makaman atilare na HIMARS — makaman da ake ganin su suka taimaka wajen nasarorin da Ukraine take samu a filin daga kan dakarun sojin Rasha a wannan lokaci.

Haka zalika za a ba su naurorin kakkabo jirage marasa matuka, da karin harsasai da na’urar hango makamai da motoci masu sulke.

Tallafin dai zai ba da damar ba da kwanturagin wadannan makamai, maimakon a debo makaman daga rumbun makaman Amurka, da kuma tsara yadda Ukraine za ta ci gajiyar makaman na tsawon lokaci.

BBC