Dan Majalisar Jiha Na Ungogo Aminu Sa’ad Ya Rasu

Ɗan Majalisar Dokokin Jihar Kano mai wakiltar Karamar Hukumar Ungogo, Aminu Sa’adu Ungogo, ya rasu a Kano.

Mai magana da yawun Majalisar Dokokin Jihar Kano, Kamaludeen Sani Shawai, ya tabbatar da rasuwar ɗan majalisar , inda ya ce marigayin ya kamu da gajeriyar rashin lafiya jim kaɗan bayan ya  isa Majalisar Dokoki.

A cewar Shawai, an garzaya da Aminu Sa’adu zuwa asibiti domin samun kulawar gaggawa, amma daga bisani likitoci suka tabbatar da rasuwarsa da yammacin ranar.

Ya ƙara da cewa za a gudanar da sallar jana’izar marigayin da misalin ƙarfe 6 na yamma a ranar Talata.

Rasuwar Aminu Sa’adu ta haifar da jimami a Majalisar Dokokin Jihar Kano da kuma Karamar Hukumar Ungogo, inda abokan aikinsa da ‘yan mazabarsa ke bayyana alhini kan rasuwar ɗan majalisar, wanda ya kasance mai wakiltar yankinsa a zauren majalisar jihar.