An Yaba Da Rawar Da Aminu Abdullahi Ibrahim Ke Takawa Wajen Cigaban Al’umma A Kano

DAGA AHMAD MUHAMMAD SANI GWARZO, ANIPR

Wata sanarwa da aka fitar ga manema labarai ta yaba da irin gagarumar gudummawar da Aminu Abdullahi Ibrahim ke bayarwa wajen inganta rayuwar al’umma, musamman a fannonin lafiya, da cigaban zamantakewa a Jihar Kano.

A cikin sanarwar, Ahmad Muhammad Sani Gwarzo ya ce ayyukan jinƙai da na wayar da kai da Aminu Abdullahi Ibrahim ke gudanarwa sun taimaka matuƙa wajen sauƙaƙa rayuwar jama’a, musamman masu rauni da ke bukatar kulawa ta musamman.

Dan Jarida A Kano Aminu Abdullahi Ya Shirya Horarwa Da Raba Audugar Mata Kyauta.

“Mun yi imani cewa duk wani aiki na alheri yana gudana ne da yardar Allah. Saboda haka muna roƙon Allah Maɗaukakin Sarki Ya ci gaba da saka masa da lada mai yawa bisa irin wannan gagarumar hidima ga bil’adama,” in ji sanarwar.

Sanarwar ta bayyana Aminu Abdullahi Ibrahim a matsayin sahihin abokin cigaban al’umma, wanda ke goyon bayan adalci, daidaito da gaskiya, tare da mayar da hankali kan walwalar jama’a.

Daya daga cikin manyan ayyukan da aka jaddada shi ne shirye-shiryensa na wayar da kai kan lafiyar haila da rarraba kayan tsaftar mata, wanda ke taimakawa ‘yan mata masu tasowa wajen samun ilimi, kulawa da kariya ta musamman.

Sanarwar ta kara da cewa, duk da kasancewarsa ɗan jarida, Aminu Abdullahi Ibrahim yana taka rawar gani wajen ayyukan jinƙai da wayar da kai, inda ake kallonsa a matsayin mutum mai tausayi da hangen nesa kan makomar al’umma.

Haka kuma, an ce mutuncinsa da gaskiyarsa sun sa ya samu karɓuwa daga jama’a da wasu hukumomi, tare da zama abin koyi ga matasa, kwararru da sauran masu aikin sa kai.

A cewar sanarwar, ayyukansa na tallafa wa ilimin lafiya da adalcin zamantakewa na taimakawa wajen gina al’umma mai ƙarfi, tsaro da kwanciyar hankali.

Sanarwar ta kammala da roƙon Allah Ya ci gaba da saka wa Aminu Abdullahi Ibrahim da dukkan masu bayar da gudummawar alheri, tare da sanya ayyukansu su zama alheri mai ɗorewa ga bil’adama.