Mata Kuyi Rajistar Katin Zaɓe Domin Kare Muradunku A Tsarin Dimokuraɗiyya ‎ ‎ ‎—Bilkisu Yakubu Indabo,

Mai bai wa gwamnan jihar shawara kan harkokin mata Hajiya Bilkisu Yakubu Indabo, ta yi kira ga mata a faɗin jihar da su fito su yi rajistar katin kaɗa kuri’a (CVR), tana mai cewa hakan ne zai ba su damar kare muradunsu a tsarin dimokuraɗiyya.

‎Ta bayyana hakan ne yayin ganawa da manema labarai bayan taron kwamitin sa ido kan rajistar masu zaɓe, wanda Ibrahim Abdullahi Waiya, kwamishinan yaɗa labarai da harkokin cikin gida na jihar ya jagoranta.

‎Jarumin Barkwanci Rajpal Yadav Ya Dawo Bakin Aiki Bayan Fitowa Daga Kurkuku Saboda Bashi

‎A cewarta, mata na daga cikin manyan masu fitowa zaɓe a Najeriya, don haka ya zama wajibi su tabbatar sun yi rajista tare da karɓar katin zaɓensu kafin lokacin zaɓe.

‎Ta ce ƙarfafa shigar mata cikin rajistar zaɓe wata hanya ce ta zurfafa dimokuraɗiyya da kuma tabbatar da wakilci mai ma’ana a harkokin shugabanci.

‎Har ila yau, ta yabawa yadda gwamnatin jihar ƙarƙashin jagorancin Abba Kabir Yusuf ke ɗaukar matakan bunƙasa mata, tana mai cewa tsare-tsaren da gwamnati ke aiwatarwa na taimakawa wajen ƙarfafa su a fannoni daban-daban na rayuwa.

‎Mai ba gwamnan shawarar, wadda ma’aikaciyar jinya ce kuma tsohuwar shugabar rikon ƙwarya ta Wudil Local Government Area, ta bayyana cewa ofishinta ya tsara dabaru na musamman domin jawo hankalin mata su shiga rajistar.

‎

‎Dabarun Wayar da Kai

‎

‎Ta ce dabarun sun haɗa da:

‎

‎ƙara amfani da kafafen yaɗa labarai,

‎

‎gangamin wayar da kai a matakin al’umma,

‎da kuma ziyarar gida-gida a birane da karkara.

‎

‎Ta kuma yi kira ga shugabannin al’umma, ƙungiyoyin farar hula da kafafen yaɗa labarai da su mara wa wannan ƙoƙari baya domin tabbatar da yawan shigar mata cikin rajistar zaɓe.

‎Masu ruwa da tsaki na ganin cewa ƙarin mayar da hankali kan shigar mata cikin rajistar zaɓe zai taimaka wajen ƙara yawan masu rajista tare da ƙarfafa wakilcin jama’a a tsarin dimokuraɗiyyar jihar.