Zargin Cin Mutunci Ga ‘Yan Jarida Daga Wasu Jami’an Gwamnatin Kano Na Kara Fitowa

A Jihar Kano, wasu ƴan jarida da ma’aikatan kafafen yaɗa labarai sun fito fili suna zargin wasu jami’an gwamnati da cin mutunci da kuma kai musu hari yayin da suke gudanar da aikinsu — zarge-zargen da ke jawo muhawara kan kariyar ‘yancin aikin jarida a jihar.

‎Wani ɗan jarida, Mubarak Auwal daga Unguwa Uku, ya ce ya fuskanci cin mutunci daga jami’in gwamnatin jihar, Auwal Sani Rogo, a lokacin wani taron siyasa da ya shafi karɓar Gwamna Abba Kabir Yusuf zuwa jam’iyyar All Progressives Congress (APC).

‎Ƙungiyar Kare Haƙƙin Dan Adam Ta Yi Allah-Wadai Da Zargin Cin Zarafin Ɗan Jarida A Kano

‎Rikici Lokacin Watsa Shiri Kai Tsaye

‎Mubarak ya ce lamarin ya faru ne yayin da yake gudanar da watsa shiri kai tsaye a kafar Hikima Radio, inda aka samu takaddama tsakanin jami’an tsaro da shugaban karamar hukumar Danbatta bayan an hana shi shiga wurin manyan baƙi.

‎A cewarsa, jami’in ya bukaci ya dakatar da watsa shirinsa, amma ya ƙi, yana mai cewa yana aiwatar da aikinsa ne na jarida. Ya ce daga bisani ya wallafa rahoton abin da ya faru.

‎Zargin Hari Kan Mai Daukar Hoto

‎Wani mai daukar hoto a gidan talabijin na Abubakar Rimi Television (ARTV), Madi’u Adamu, shi ma ya zargi jami’in da kai masa hari a bainar jama’a yayin bikin cika shekaru 65 da samun ‘yancin kan Najeriya da aka gudanar a Kano.

‎Filin wasa na Sani Abacha Stadium

‎

‎A cewar Adamu, yana tsaka da daukar hotunan bikin ne sai jami’in ya tunkare shi, ya tura shi ƙasa tare da zaginsa a gaban jama’a, ciki har da jami’an gwamnati da sauran ƴan jarida.

‎Ya bayyana abin a matsayin abin kunya da damuwa, musamman ganin cewa ya faru ne a wani babban taron gwamnati.

‎

‎Batun Barazana Ga Ɗan Jarida

‎A wani lamari makamancin haka a baya, an zargi mai taimakawa gwamna kan harkokin sadarwa, Ibrahim Adam, da wallafa hoton ɗan jarida Nazeer Bashir Tsamiya a shafukan sada zumunta tare da tambayar abin da ya kamata a yi masa.

‎Rahotanni sun ce hakan ya biyo bayan binciken da aka yi kan zargin rashin zuwa aiki da wasu likitoci a wani asibiti a Kano — lamarin da ya tayar da muhawara kan lafiyar marasa lafiya.

‎Tsamiya ya bayyana cewa wallafa hotonsa ya jefa rayuwarsa cikin barazana, yana mai cewa ya fuskanci tsangwama da barazanar kai masa hari bayan rahoton.

‎

‎Kiran Bincike da Kare ‘Yancin Jarida

‎Masu sa ido kan harkokin yaɗa labarai na kira ga hukumomi su binciki zarge-zargen domin tabbatar da gaskiya da kuma kare ‘yancin ƴan jarida yayin gudanar da aikinsu.

‎Batun ya kara tayar da tambayoyi kan matakin kariya da ake bai wa ‘yan jarida a lokutan manyan taruka da al’amuran siyasa a Jihar Kano.