Kano: Gwamnati Za Ta Bayyana Ayyukanta Domin Ƙara Goyon Bayan Jama’a

mai bai wa gwamna shawara kan wayar da kai da haɗa kan al’umma, Hajiya Bilkisu Yakubu Indabo, ta ƙaddamar da wani shiri na musamman da nufin haskaka ayyuka da nasarorin gwamnatin Gwamna Abba Kabir Yusuf, tare da ƙarfafa hulɗa da jama’a.

An shirya gudanar da taron ne a ranar Litinin, 6 ga Afrilu, 2026, a ɗakin karatu na Murtala Muhammad Library, inda za a gabatar da bayanai dalla-dalla, masu tushe, kan yadda gwamnatin ta gudanar da aikinta tun bayan hawanta mulki.

Shugaban INEC Na Neman Yi Wa Hukuncin Kotu Hawan Ƙawara — ADC

A cewar Indabo, shirin zai mayar da hankali kan manyan nasarori da aka samu, musamman a fannonin gine-ginen more rayuwa da sake fasalin birane, da kuma ci gaba a ɓangarorin tattalin arziki, zamantakewa da siyasa.

Ta ƙara da cewa manufar wannan dandali ita ce tabbatar da cewa jama’a na samun sahihin bayani kan ayyukan gwamnati, tare da ƙarfafa su shiga cikin harkokin mulki ta hanyar bayyananniyar sadarwa.

Ana sa ran shirin zai taimaka wajen ƙara yarda da gwamnati a idon jama’a, inganta ɗaukar alhaki, da kuma bunƙasa haɗin gwiwa wajen aiwatar da manufofin ci gaban jihar.

Masu ruwa da tsaki daga fannoni daban-daban, ciki har da ƙungiyoyin farar hula, ƙwararru, matasa da ‘yan siyasa, na daga cikin waɗanda aka gayyata domin halartar taron, a wani yunƙuri na ƙarfafa tattaunawa mai ma’ana da haɗin kai.

Masu lura da al’amura sun ce wannan mataki na cikin dabarun gwamnatin Yusuf na ƙarfafa manufofinta ta hanyar nuna hujjojin ayyuka da kuma ci gaba da hulɗa da al’umma.