Dr. Muhammed Musa Zango Ya Kaddamar Da Neman Takarar Sanatan Kano Ta Tsakiya A Jam’iyyar APC

Advertisements

‎Dr. Muhammed Musa Zango, wanda aka fi sani da Fatah, ya ayyana kudirinsa na tsayawa takarar Sanatan Kano ta Tsakiya a karkashin jam’iyyar APC, gabanin babban zaben 2027.

‎Da yake jawabi a wajen taron kaddamarwar da aka gudanar a Kano, Fatah ya ce ya yanke shawarar shiga takarar ne bisa dogon nazari da kuma gogewarsa wajen hulda da al’umma tun daga matakin kasa.

‎Kwankwaso Ya Ce Bai Yanke Shawara Kan Makomar Siyasarsa Ba Har Yanzu

‎Ya bayyana cewa tun a shekarar 2003 ya fara tallafa wa kananan ‘yan kasuwa a yankinsa da jari, domin inganta harkokin kasuwanci da dogaro da kai, abin da ya ce ya kara masa kwarin gwiwar shiga siyasa domin wakiltar jama’a yadda ya kamata.

‎A cewarsa, wakilci nagari shi ne wanda ke sauraron bukatun talakawa tare da mayar da su cikin dokoki da tsare-tsaren da za su inganta rayuwarsu.

‎Fatah ya kuma gabatar da wasu muhimman manufofi guda bakwai da ya ce za su zama tubalin aikinsa idan aka zabe shi:

‎Ya ce zai tabbatar da wakilci mai inganci a Majalisar Dokoki ta Kasa, ta hanyar gabatar da kudurori da za su amfanar da jihar Kano.

‎Haka kuma, ya ce zai mai da hankali kan bunkasa noma domin kara samar da abinci da habaka tattalin arziki.

‎A bangaren matasa da mata kuwa, ya yi alkawarin samar da shirye-shiryen horaswa da tallafin sana’o’i, tare da kula da masu bukata ta musamman.

‎Game da kiwon lafiya, Fatah ya ce zai yi kokarin ganin an inganta asibitoci da kuma saukaka samun kulawar lafiya ga al’umma.

‎Sannan ya jaddada muhimmancin gyaran hanyoyi da sauran ababen more rayuwa, ciki har da farfado da aikin bututun iskar gas na Ajaokuta–Kaduna–Kano (AKK).

‎Har ila yau, ya yi alkawarin mayar da hankali kan samar da ruwan sha mai tsafta a yankunan karkara da birane.

‎A karshe, ya yi kira da a farfado da masana’antar yadi ta Kano, wadda ya ce tana da matukar muhimmanci ga tattalin arzikin jihar.

‎Ya kara da cewa, idan aka ba shi dama, zai yi aiki tukuru wajen samar da sauyi mai ma’ana da zai amfani al’ummar Kano ta Tsakiya.

‎Fitowarsa takara na kara zafafa fafatawar siyasa a wannan yanki mai muhimmanci a jihar Kano gabanin zaben 2027.