Matar Babban Jami’in Kuɗaɗen ISWAP Ta Miƙa Wuya Ga Dakarun Soji A Borno ‎

Rundunar Sojin Nijeriya ta ce matar wani babban jami’in kula da harkokin kuɗaɗen ƙungiyar ISWAP tare da ɗanta mai shekara 11 sun miƙa wuya ga dakarun Operation Haɗin Kai a ƙauyen Kusuma da ke Jihar Borno.

‎A cikin wata sanarwa da jami’in yaɗa labaran rundunar na riƙo, Kyaftin Mohammed Goni, ya fitar a ranar Asabar, ya ce bincike ya nuna cewa mijin matar, wanda shi ma babban kwamandan ISWAP ne, ya miƙa wuya tun ranar 25 ga Yuli.

‎Jami’an Tsaro Sun Kama Wanda Ke Kai Wa ’Yan Kayan Aiki A Zamfara

‎Sanarwar ta ce bayan ya miƙa wuya, shi ne ya umurci matarsa ta fito daga maɓoyarsu tare da ɗansu domin su miƙa wuya ga sojoji.

‎Rundunar ta bayyana cewa an riga an tantance matar da ɗanta, yayin da ake ci gaba da tattara bayanai da gudanar da bincike a kansu bisa doka.

‎A wani samame na daban kuma, sojoji sun kama mutum shida da ake zargin suna taimaka wa mayaƙan ISWAP wajen gudanar da harkokinsu a wasu sassan Jihar Borno.

‎Bincike ya nuna cewa ana zargin mutanen da taimaka wa ƙungiyar wajen samun kuɗaɗen shiga ta hanyar kasuwancin dabbobi a kasuwannin Gubio, Damasak da Ajuwango.

‎Haka kuma, rundunar ta ce mayaƙan ISWAP sun tsere bayan wani samame da dakarun suka kai yankin Turoh bisa bayanan sirri da suka samu.

‎Bayan binciken yankin, sojojin sun ƙwato babura guda biyu da kuma tarin miyagun ƙwayoyi da mayaƙan suka bari a wurin.

‎Rundunar ta ce za ta ci gaba da gudanar da hare-hare bisa sahihan bayanan sirri domin daƙile ayyukan ƙungiyoyin masu tayar da ƙayar baya a Arewa maso Gabashin ƙasar.

PRNIGERIA