Kotun Daukaka Kara Ta Ce Haramun Ne Jami’an Kwastam Su Rika Kwace Shinkafa Da Sauran Kayayyaki Akan Tituna

DAGA NUSAIBA ABDULLAHI TUKUNTAWA 

Kotun daukaka kara da ke Kaduna ta bayyana cewa hukumar kwastam ta Najeriya ba ta da hurumin kwace shinkafar da ake sayarwa a kasuwannin bayan fage.

Da take yanke hukuncin a ranar Laraba, kotun daukaka kara ta tabbatar da hukuncin da babbar kotun tarayya da ke Kaduna ta yanke a baya, inda ta wanke Suleiman Mohammed daga tuhumar da ake masa na shigo da kaya da aka haramta.

Buhari Ya Magantu Game Da Labarin Da Ake Yadawa Cewa An Kwace Filin Sa A Abuja.

Kotun ta umurci hukumar kwastam ta mayar da buhunan shinkafa 613 na kasar waje, buhunan gero 80, da wata babbar mota da aka kama daga hannun Mohammed. Kayayyakin da aka kwace wanda kudinsu ya kai kusan Naira miliyan 200, an karbe su ne daga hannun dan kasuwar da ke kan hanyar Kaduna zuwa Zariya a ranar 14 ga watan Yuni, 2019.

Kotun ta jaddada cewa babbar hanyar Kaduna zuwa Zariya ba kan iyaka ba ce, inda ta ce: “Hukumar Kwastam ta Najeriya ba ta da hurumin kama Suleiman Mohammed tare da kwace masa kayansa a kan titin Kaduna zuwa Zariya, wanda hakan ya saba wa dokar hana zirga-zirga. shigo da shinkafar waje.”

A cewar kotun aikin hukumar kwastam shine dakile shigo da kayyakin tun daga kan iyakoki wajen hana fasakwauri.

An yi watsi da daukaka karar, kuma kotu ta umarci hukumar kwastam da ta bi umarninta cikin gaggawa.

PLATINUMPOST NEWS