Jami’ar ABU Ta Haramta Sanya Matsattsun Kaya Da Runguma A Farfajiyar Makaranta

Jami’ar Ahmadu Bello da ke Zariya (ABU) ta haramta sanya wasu nau’o’in kaya da kuma wasu halaye da ta bayyana a matsayin rashin kunya da girmamawa, a wani mataki na ƙoƙarin kare martabar al’adu da addini.

A cikin wata sanarwa da hukumar gudanarwar jami’ar ta fitar a ranar Litinin, ta bayyana cewa daga yanzu, haramun ne ga ɗalibai da malamai su bayyana a makarantar da kaya irin su ‘spaghetti straps’, kayan da ke bayyana sassan jiki (see-through), wando mai huji-huji da tambura, siket da ba su kai gwiwa ba (sai idan a wajen motsa jiki), da sauran kaya da ba su dace da yanayin karatu ba.

An Raba Naira Tiriliyan 1.65 Tsakanin Gwamnatin Tarayya, Jihohi Da Kananan Hukumomi

Sanarwar ta kuma haramta ɗaukar wasu halaye a farfajiyar jami’ar kamar runguma, sumbata, zama a cinyar juna, da sanya tufafi da ke iya motsa sha’awa a bainar jama’a.

Haka kuma, jami’ar ta hana sanya dogon gashin gira ko na ido, gyaran gashi da murza shi ga maza, kitso ga maza, da kuma sanya sarkar ƙafa da ƙwalli. Ga maza kuma, an haramta tara gashi ko gemu da yawa da ba a kula da shi.

Sauran abubuwan da dokar ta haramta sun haɗa da sanya tabarau masu kala ba tare da izinin likita ba, da sanya hular hana salla ta wata hanya da ta saɓa da yadda aka saba.

Jami’ar ta ce wannan mataki ya zama dole ne duba da yadda wasu daga cikin masu shiga makarantar ke bayyanawa cikin kayan da ta bayyana a matsayin marasa ɗabi’a da girmamawa, abin da ya saba da ka’idar rayuwa da tarbiyyar ɗalibai.

Sai dai wannan matakin ya haifar da ce-ce-ku-ce a tsakanin wasu daga cikin ɗaliban da malamai, inda wasu ke ganin hakan tamkar tauye musu ‘yancin bayyana kansu ne.