Yawan Cin Gishiri Na Haddasa Hawan Jini Da Bugun Zuciya  —Masana

Yawan cin gishiri da ake yi a Najeriya na zama barazana ga lafiyar jama’a, inda ya ke haddasa hawan jini, bugun zuciya da sauran cututtukan da ke da nasaba da jijiyoyi da jini.

A cewar Hukumar Lafiya ta Duniya (WHO), bai kamata manya su rika cin fiye da gram biyu na sinadarin sodium a rana ba — wanda ke daidai da gram 5 na gishiri. Sai dai rahotanni sun nuna cewa yawancin ’yan Najeriya na cin tsakanin gram 7 zuwa 9 a rana, wanda ya ninka shawarar WHO sau biyu.

Kotun Ƙoli Ta Tabbatar Da Sanata Monday Okpebholo A Matsayin Sahihin Gwamnan Edo.

Wannan matsakaicin adadi dai ya yi dai-dai da na sauran kasashen nahiyar Afrika ta Kudu da kuma ya dara na kasashen Birtaniya (7.5g) da Amurka (8.5g).

Masana lafiya sun bayyana cewa rage yawan cin gishiri na taimakawa wajen rage hawan jini da kuma barazanar kamuwa da cututtuka irin su bugun zuciya, cutar ƙoda, da kumburin hanta.

Sun shawarci mutane da su rika duba bayanan sinadaran kayan abinci kafin saye, su kuma zaɓi abinci marasa gishiri ko kuma su guji amfani da gishiri da yawa yayin dafa abinci. Haka kuma, sun ce ya dace a rika amfani da kayan ƙamshi na tsirrai maimakon gishiri.

Masu masana’antar sarrafa abinci na da rawar da za su taka wajen rage sinadarin sodium a kayayyakinsu, ta hanyar sake tsara sinadaran tare da samar da kayan abinci masu lafiya.

Baya ga haka, masana sun bukaci gwamnatin Najeriya da ta fitar da ƙa’idoji masu ƙarfi da za su tilasta a bayyana sinadarin gishiri da ake amfani da shi a jikin kwalin abinci, tare da wayar da kan al’umma kan illolinsa.

A cewar Dr Emmanuel Sokpo na NHED, yawan cin gishiri da ake yi a kasar na daga cikin manyan abubuwan da ke haifar da karuwar cututtuka marasa yaɗuwa kamar hawan jini da bugun zuciya.

“Yawancin kayan abinci da ake sarrafawa a Najeriya na ɗauke da yawan sodium da ya wuce kima, kuma mafi akasari ba a bayyana hakan a jikin kwalayen su ba,” in ji shi.