KASSTOWA Ta Ƙara Jami’an Tsaro A Wajen Samar Da Ruwa Na Joda

Advertisements

Hukumar Kula da Samar da Ruwan Sha da Magudanan Ruwa ta Jihar Kano (KASSTOWA) ta ƙara tura jami’an tsaro zuwa tashar samar da ruwa ta Joda, domin kare kayayyakin aikin tashar daga sata, ɓarna da shiga ba bisa ƙa’ida ba.

Hukumar ta bayyana hakan ne bayan ziyarar tantance yanayin tsaro da Mukaddashin Manajan Daraktanta ya kai tashar a ranar 28 ga Oktoba, 2026.

A cikin wata sanarwa da Sashen Hulɗa da Jama’a na hukumar ya fitar, ta ce tura ƙarin jami’an tsaron na da nufin hana satar kayayyaki, lalata ababen aiki da kuma dakile duk wata barazana da ka iya kawo cikas ga ayyukan tashar.

Sanarwar ta ce matakin na cikin ƙoƙarin kare muhimman ababen more rayuwa da tabbatar da dorewar samar da ruwan sha ga al’umma, wanda ya yi daidai da manufar gwamnatin Gwamna Abba Kabir Yusuf na kare kadarorin gwamnati da inganta ayyukan hidima.

Hukumar ta kuma bayyana cewa tana ƙarfafa haɗin gwiwa tsakanin hukumomin gwamnati domin tabbatar da tsaron ababen more rayuwa da inganta ayyukan samar da ruwa.

KASSTOWA ta yi kira ga shugabannin al’umma, sarakunan gargajiya, ƙungiyoyin matasa da mazauna yankin da su taimaka wajen kare tashar ta hanyar sanya ido da kai rahoton duk wani abu da suke zargin ba daidai ba ne ga jami’an tsaro.

Ta jaddada cewa kare kayayyakin samar da ruwa nauyi ne da ya rataya a wuyan kowa, domin tabbatar da ci gaba da samar da ruwan sha ga al’umma.