An Kashe Mutum 1,872 An Sace 714 A Wata 4 A Najeriya -Rahoto

Advertisements

DAGA KABIRU BASIRU FULATAN

Rahoton ya ce mahara sun kashe mutum 1,872 a Najeriya tare da sace wasu 714, aka kuma jikkata wasu daga watan Janairu zuwa Afrilu

Mahara sun kashe mutum 1,872 a Najeriya tare da sace wasu 714 daga watan Janairu zuwa Afrilun shekarar nan ta 2023, a cewar rahoton Gidauniyar Stefanos mai rajin kare hakkin dan Adam da wanzar da zaman lafiya.

Gwamnan Kano Abba Kabir Yusuf Ya Kwace Asibitin Hasiya Bayero Da Gwamnatin Ganduje Ta Siyar

Rahoton kungiyar mai zaman kanta ya kara da cewa an jikkata wasu mutum 65 a cikin wata hudun, inda ta bayyana damuwa kan yawan samun tashe-tashen hankula a Najeriya, du da cewa kasar ba a cikin yaki ta ke ba.

Shugabar wayar da kai a kungiyar, Fatima Njoku, ta yi kira ga hukuma da ta gaggauta daukar matakan maganance sabubban tashe-tashen hankula a Najeriya.

A taron manema labarai da kungiyar ta shirya a Abuja, Fatim Njoku ta ce, “Akwai tashin hankali, yadda ake bin talakawa da babu makami a hannunsu, har gida cikin tsakar dare a karkashe su da bindigogi da adduna, a kwashe dan abin da suke da shi, a kona kauyukansu.

“Wani abin tashin hankalin shi ne ba a kama masu yin wannan barna, ballantana su fuskanci hukunci,” in ji ta.

Ta ce, “Bayanan da muka tattara daga shaidu daga sassan kasar nan sun nuna salon masu kai hare-haren kusan kusan iri daya ne, hakazalika yanayin mutane da suke kashewa.

“Hakan ya faru a yankunan Agatu, Guma, Logo na jihar Binuwai da kuma Kagoro, Zangon Kataf, Kajuru, Kafanchan a Jihar Kaduna, sai Bassa, Riyom, Barkin Ladi da kuma Mangu a Jihar Filato da dai sauransu.”

Da yake nasa jawabi a wurin taron, Shugaban Kungiyar Al’ummar Mwaghavul, Cif Joseph Gwankat, ya yi kira ga hukumomi da su hanzarta daukar matakan kawo karshen hare-haren da ake kai wa yankin.

Ya bayyana cewa tashe-tashen hankulan na dagula musu al’amura, sannan ya jaddada muhimmancin gwamnati ta magance matsalar daga tushe.