Barcelona Ta Dare Kan Teburin La Liga Bayan Doke Rayo Vallecano

DAGA UMAR IBRAHIM HOTORO 

Kungiyar Barcelona ta sake darewa kan teburin gasar La Liga bayan da ta samu nasara mai wahala da ci 1-0 a kan Rayo Vallecano a wasan da suka buga a daren jiya.

Robert Lewandowski ne ya ci wa Barcelona kwallon daya tilo a wasan, bayan da ya samu bugun daga kai sai mai tsaron gida a minti na 28.

Mutum 80 Sun Tsallake Rijiya Da Baya A Hadarin Jirgin Sama A Toronto

Wannan nasara ta bai wa Barcelona damar amfani da damar da Real Madrid da Atletico Madrid suka rasa, bayan da duka kungiyoyin suka tashi kunnen doki a wasanninsu na karshen mako.

A halin yanzu, Barcelona na saman teburin gasar da maki 51, dai-dai da Real Madrid, amma tana gaba da banbancin kwallaye. Atletico Madrid kuwa tana mataki na uku da maki 50.

Barcelona ta ci kwallo 65 a wasannin La Liga 24 da ta buga, yayin da aka zura mata 25 a raga. A nata bangaren, Real Madrid ta ci kwallo 52, aka zura mata 23.

Kungiyar ta Xavi za ta ci gaba da kokari don kare matsayinta a saman teburin gasar yayin da fafatawar neman kofin La Liga ke kara daukar zafi.