KARYEWAR GADA NA BARAZANA GA NOMA A ROGO:  Manoma Na Kira Ga Gwamnati Ta Ɗauki Matakin Gyara Kafin Damina ‎

Al’ummar garin Gwangwan da ke karamar hukumar Rogo a Jihar Kano sun bukaci Gwamnatin Jihar Kano da ta gaggauta daukar matakin gyara gadar da ta lalace kafin zuwan damina, domin kauce wa karin matsalolin da suke fuskanta bara.

‎Mazauna yankin sun bayyana cewa karyewar gadar na kawo tsaiko mai tsanani ga zirga-zirga, musamman idan ruwa ya fara sauka, lamarin da ke hana mutane fita ko shiga garin cikin sauki.

‎Jakadan Saudiyya a Najeriya da Dangote sun gana domin ƙarfafa alaƙar tattalin ariziƙi a tsakanin ƙasashen biyu

‎“Babban abin da muke roko shi ne a gyara mana wannan gada kafin damina ta fara. Idan aka bari ruwa ya zo, wahalar za ta ninka,” in ji wani mazaunin yankin.

‎Sun kara da cewa matsalar gadar na shafar bangarori da dama na rayuwa, ciki har da kai marasa lafiya asibiti, zuwa makaranta da kuma safarar amfanin gona zuwa kasuwanni.

‎Bugu da kari, manoma a yankin sun bayyana cewa a bara sun fuskanci matsaloli matuka wajen fitar da amfanin gonarsu zuwa kasuwanni, lamarin da ya janyo musu mummunar asara, musamman a bangaren sayar da albasa.

‎“Mun yi asara sosai a bara saboda rashin gada. Ba mu samu damar kai amfanin gona kasuwa cikin lokaci ba, musamman albasa da ta lalace kafin a sayar,” in ji wani manomi.

‎Saboda haka, manoman sun jaddada kiran a gaggauta gyaran gadar kafin daminar bana ta sauka, domin kauce wa sake fuskantar irin wannan asara da ta gabata.

‎A cikin wata sanarwa, Sakataren Kungiyar Cigaban Matasan Karamar Hukumar Rogo , Malam Auwalu A. A. Daya So, ya jaddada bukatar daukar matakin gaggawa, yana mai cewa gyaran gadar zai taimaka wajen bunkasa tattalin arzikin yankin.

‎Ya kuma bukaci gwamnati da ta duba yiwuwar inganta hanyoyin da ke hada Rogo, Gwangwan, Ruwan Bago da Sundu domin saukaka harkokin noma da kasuwanci.

‎Al’ummar yankin sun ce suna da yakinin cewa gwamnati za ta saurari kukansu, tare da daukar matakin da ya dace kafin damina ta fara sauka.