Sauya Fasalin Naira: Buni Ya Bukaci Karin Bankuna A Yobe 

DAGA KABIRU BASIRU FULATAN

Gwamna Mai Mala Buni na Jihar Yobe, ya yi kira ga bankunan kasuwanci da su kara bude sabbin rassa a fadin jihar domin saukaka hada-hadar kasuwanci.

Buni ya yi wannan roko ne a Damaturu a lokacin da yake kaddamar da na’urar cirar (POS) da bankin United Bank for Africa (UBA) ya bai wa jihar domin bunkasa kudaden shiga.

‘Za Mu Yi Amfani Da Na’urorin Zamani Wajen Dakile Laifuka A Kano’

Ya ce, kara kafa wasu sabbin rassa a fadin jihar zai karfafa hada-hadar banki a tsakanin mazauna karkara.

“A Yobe, hudu ne kawai daga cikin kananan hukumomi 17 ke da bankuna.

Yawancin mutanenmu ko dai manoma ne ko kuma makiyaya da suka fi yarda da rike tsabar kudi maimakon hada-hadar banki.

“Lokaci ya yi da za ku fadada ayyukanku a sauran kananan hukumomin,” in ji gwamnan.

Buni, ya ce bankunan suna da rassa da yawa, toshe tsofaffin kudaden daidai da manufar sake fasalin Naira na Babban Bankin Babban zai sa a yi nasara.

“Ina kira ga bankunan da su kara wayar da kan jama’a game da manufofin tare da samar da hanyar da mutane za su iya canza tsoffin takardun kudinsu zuwa sabo cikin sauki kafin ranar 31 ga Janairu, 2023,” in ji shi.

Gwamnan ya yaba wa bankin UBA bisa wannan tallafin wanda a cewarsa hakan zai saukaka biyan kudaden shiga da kuma tara kudaden shiga.

Buni ya yaba wa bankunan kasuwanci da sauran abokan hulda bisa goyon bayan jihar wajen aiwatar da manufofi da shirye-shirye masu tasiri kai tsaye ga rayuwar al’umma.

A nasa jawabin, shugaban hukumar tara kudaden shiga ta cikin gida, Alhaji Abatcha Geidam, ya bada tabbacin yin amfani da na’urar yadda ya kamata.