Jami’an ’Yan Sanda Sun Kwato Bindiga Daga Hannun Wani Matashi Da Ake Zargi da Dukan Mahaifiyarsa A Kano 

Rundunar ’Yan Sandan Jihar Kano ta cafke wani matashi mai shekaru 25, Ididiong James, bisa zargin dukan mahaifiyarsa tare da mallakar bindiga ba bisa ka’ida ba a unguwar Panshekara da ke birnin Kano.

Lamarin ya faru ne a ranar 25 ga Janairu, 2026, da misalin karfe 7:30 na yamma, bayan da jami’an ’yan sanda daga ofishin Panshekara suka samu kiran gaggawa kan rikici a wani gida da ke yankin.

Tayar Jirgin British Airways Ta Ɓalle Jim Kaɗan Bayan Tashi Daga Las Vegas

Rahotanni sun nuna cewa da isar jami’an tsaro wurin, sun tarar da wanda ake zargin yana dukan mahaifiyarsa, sai dai ya tsere kafin a samu damar cafke shi. Daga bisani, mahaifiyar tasa ta mika wa ’yan sanda bindigar kirar English Beretta tare da harsasai guda takwas, inda ta bayyana cewa ta gano bindigar a cikin jakar ɗanta, amma ta ƙi mayar masa ita saboda fargabar tsaro.

Mahaifiyar ta kuma bayyana damuwarta kan sauyin halayen ɗanta, tana mai cewa tun bayan dawowarsa daga bukukuwan sabuwar shekara, ta lura da canji mai tayar da hankali a ɗabi’unsa.

A wani samame da suka kai daga bisani, jami’an tsaro sun cafke wanda ake zargin, kuma a halin yanzu yana hannun rundunar ’yan sanda domin ci gaba da bincike.

Da yake tsokaci kan lamarin, Kwamishinan ’Yan Sandan Jihar Kano, Ibrahim Adamu Bakori, ya yabawa mahaifiyar bisa jajircewa da matakin da ta dauka wajen kare kanta da lafiyar al’umma. Ya kuma bukaci iyaye da su kasance masu sanya ido kan halayen ’ya’yansu, tare da kai rahoton duk wani abin da ke sanya shakku ga hukumomin tsaro.

Rundunar ’Yan Sandan Jihar Kano ta sake jaddada bukatar hadin kan al’umma da jami’an tsaro, tana mai kira ga jama’a da su rika kai rahoton duk wani motsi da ba su yarda da shi ba zuwa ofishin ’yan sanda mafi kusa ko ta lambobin gaggawa na rundunar.