‎Kotu Ta Daure Matar Tsohon Shugaban Kasar Koriya Ta Kudu A Gidan Yari Bayan Samunta Da Laifin Karbar Cin Hanci

‎Wata kotu a Koriya ta Kudu, ta yanke wa matar tsohon shugaban kasar Kim Keon Hee hukuncin daurin shekara daya da watanni takwas a gidan yari bayan samun ta da laifin karbar cin hanci daga Cocin Unification.

‎Kotun Gundumar Tsakiya ta Seoul ta ce Kim ta karɓi kuɗi da kyaututtuka masu tsada daga cocin da wasu masu hannu da shuni, da darajarsu ta kai aƙalla dala 200,000.

‎Amma kotun ta wanke ta daga wasu zarge-zarge da suka haɗa da sauya farashin hannun jari da kuma karya dokar kuɗaɗen siyasa.

‎Masu gabatar da ƙara sun bayyana cewa Cocin Unification ta bai wa Kim kyaututtuka masu daraja, ciki har da jakunkuna biyu na Chanel da abun wuya na lu’u-lu’u, a wani yunƙuri na samun tasiri a wajen matar shugaban ƙasa.

‎A kan wannan zargi ne aka gurfanar da shugabar cocin, Han Hak-ja, wadda ke fuskantar shari’a a halin yanzu.

‎A cewar masu gabatar da ƙara, Kim ta haɗa baki da ƙungiyar addini ta hanyar da ta saɓa wa ka’idar raba addini da gwamnati da kundin tsarin mulkin ƙasar ya tanada.

‎Sai dai Kim ta musanta zarge-zargen, tana mai cewa ba su da tushe.

Duk da haka, ta nemi afuwa a bainar jama’a, inda ta ce ta yi kura-kurai da dama duk da rawar da take takawa a wancan lokaci.

‎Mijinta, tsohon shugaban ƙasa Yoon Suk Yeol, an tsige shi daga mulki a shekarar da ta gabata, kuma an yanke masa hukuncin daurin shekaru biyar saboda rawar da ya taka wajen ayyana dokar ta-baci a watan Disambar 2024.

Har yanzu yana fuskantar wata shari’a dabam da ka iya kai shi ga hukuncin kisa.

‎A baya dai, a shekarar 2023, an fitar da wani bidiyo da aka ɗauka a ɓoye da ke nuna Kim na karɓar jakar Dior mai tsada, abin da ya jawo cece-kuce a ƙasar tare da raunana farin jinin gwamnatin mijinta.

AL JAZEERA