Majalisar Dattawa Ta Gabatar Da Kudurori 844 Cikin Shekaru Biyu – Inji Akpabio

Shugaban Majalisar Dattawa, Sanata Godswill Akpabio, ya bayyana cewa Majalisar Dattawa ta 10 ta karɓi da kuma gabatar da ƙudurin dokoki guda 844 tun bayan da aka rantsar da ita zuwa yanzu.

Sanata Akpabio ya bayyana hakan ne a ranar Alhamis, yayin wani zama na haɗin gwiwa da Shugaban Ƙasa, Bola Ahmed Tinubu da ‘yan majalisar tarayya, a matsayin wani ɓangare na shagulgulan Ranar Dimokuraɗiyya da aka gudanar a zauren Majalisar Tarayya, Abuja.

Sojoji Sunyi Ajalin Ɗan Auta Tare Da Ƙarin Wasu Ƴan Bindigar A Zamfara 

Taron dai ya samu halartar manyan jami’an gwamnati ciki har da Mataimakin Shugaban Ƙasa, Sanata Kashim Shettima; Sakataren Gwamnatin Tarayya, Sanata George Akume; wasu daga cikin gwamnonin jam’iyyar APC da kuma wasu tsofaffi da ‘yan majalisar da ke kan mukami a yanzu.

A cikin jawabinsa, Sanata Akpabio ya bukaci Shugaban Ƙasa da ya duba yiwuwar kafa wani gidan tarihin Ranar 12 ga Yuni — domin tunawa da muhimmancin wannan rana a tarihin dimokuraɗiyyar Najeriya, musamman ma dangane da zaɓen shugaban ƙasa na shekarar 1993 da ake kallon mafi sahihanci a tarihin ƙasar.

Ya ce, “Idan gwamnati na tafiya cikin haɗin kai, babu shakka cigaba yana samuwa.”

PUNCH